Akademik Rexhep Qosja ka thënë se një koalicion i mundshëm ndërmjet PDK-së dhe LDK-së, pas zgjedhjeve parlamentare, do të krijonte sundim gjithëpartiak, totalitar në Kosovë.
Qosja në profilin e tij në “Facebook” ka shkruar se koalicioni ndërmjet PDK-së dhe LDK-së do ta bënte të mundshëm shtimin e pamatshëm të korrupsionit, plaçkitjen e pasurisë kombëtare, nepotizmin, partisimin e të gjitha bërthamave institucionale dhe shuarjen e dhunshme të opozitës.
“Krijimi i koalicionit eventual mes Partisë Demokratike të Kosovës dhe Lidhjes Demokratike të Kosovës, të Partisë Demokratike të Kosovës me traditë përkushtuese ndaj Shqipërisë dhe të Lidhjes Demokratike të Kosovës me traditë përkushtuese ndaj Jugosllavisë, domethënë të krijosh sundim gjithëpartiak, në të vërtetë totalitar në Kosovë. Dhe ky koalicion, objektivisht, do ta bënte të mundshëm një shpërdorim shumë më të madh se deri tani të demokracisë në Kosovë: do ta bënte të mundshëm shtimin e pamatshëm të korrupsionit, plaçkitjen e pasurisë kombëtare, nepotizmin, partisimin e të gjitha bërthamave institucionale dhe shuarjen e dhunshme të opozitës dhe të mendimit e të shprehjes së lirë në Kosovën protektorat, çka edhe është sot ajo”, ka shkruar Qosja.