Komiteti Lokal për Siguri Publike në Rahovec prezantoi sot projektin për heqjen nga rrugët të qenve endacak.
Enis Berisha, udhëheqës i këtij Komiteti, tha se me vendim të komandantit të Policisë së Kosovës grupi është licencuar dhe punon në kudër të ligjit për policinë.
Komiteti ka 10 anëtarë që kanë mbajtur trajnime dhe debate me qytetarë, me qëllim të evidentimit të shqetësimet e qytetarëve. Në këtë rast shqetësimi më i madh i qytetarëve ka të bëjë me largimin e qenve endacak nga rruga dhe vendet publike. Ky projekt do të jetë afatgjatë dhe planifikohen një seri masash për eliminimin e rrezikut nga rrugët tona.
Toger Osman Ismaili tha se Policia e Kosovës në Rahovec do ta mbështesë këtë projekt me të gjitha mundësitë e veta dhe kërkohet që procedurat administrative të reduktohen.
“Me ligj ne nuk mund të bëjmë eliminimin e qenve endacak, mirëpo mund të bëjmë veprime urgjente që redukton numrin e qenve në rrugë. Ne duhet të respektojmë ligjin dhe mund të bëhet eliminim i kufizuar, që nënkupton kafshët që janë të sëmura dhe me mundësi të përhapjes së ndonjë epidemie”.
“Qentë e sëmurë paraqesin rrezik permanent dhe ndërmarrja e masave për mbrojtjen e shëndetit të qytetarëve përbën nevojë të ngutshme. Duhet të njoftohet AVUK-u dhe organet tjera që merren me mbrojtjen e shëndetit publik, ndërsa duhet të bëhet organizim më i mirë edhe me shoqatat e gjahtarëve në Rahovec, si dhe organeve komunale. Duhet eliminuar ky rrezik nga rrugët tona”.
“Sipas të dhënave numri i qenve endacak në komunën e Rahovecit arrin deri në 3000 ose më shumë”.
Marijan Shariq, nënkryetar i Komitetit tha ndërkaq se numri i qenve endacak po rritet çdo ditë dhe rreziku për njerëzit është permanent. Ndërmarrja e masave parandaluese dhe mbrojtëse është pjesë e angazhimit të KLSP-së.
“Plani ynë bazohet në dy linja kryesore, e para ka të bëjë me ndriçimin e rrugëve, ndërsa e dyta përbën ndërmarrjen e një seri masash tërheqjes nga rruga të qenve endacak, duke respektuar ligjet dhe mënyrën humane të trajtimit të qenve të tillë. Propozojmë që të formohet shërbimi për kapjen e qenve dhe strehimin e tyre. Ky shërbim duhet të jetë i pajisur me mjetet pune dhe kërkon mjete e kohë.”
Afrim Oruqi, tha se qytetarët janë shumë të shqetësuar rreth numrit të madh të qenve endacak, të cilët paraqesin rrezik të vazhdueshëm për sigurinë dhe shëndetin e njerëzve.
“Ne mundohemi të bëjmë vetëdijesimin e njerëzve nëpër lokalitete, ndërsa do të bisedojmë me pronarët e bizneseve hoteliere që të mos i hedhim mbeturinat në vende joadekuate, sepse këto vende janë burim i ushqimit për këto kafshë pa pronar dhe që bartin infeksione të ndryshme”.
“Ne dëshirojmë që këtë problem ta institucionalizojmë dhe do të hartojmë një draft rregullore për t’ia ofruar për miratim Kuvendit të Komunës. Kjo do të sigurojë mbrojtje afatgjatë të qytetarëve nga kërcënime të tilla. Në këtë projekt janë përfshirë edhe shoqatat e gjahtarëve që veprojnë në komunën e Rahovecit”.
Projekti mbështetet nga ambasada e Mbretërisë së Norvegjisë në Kosovë dhe OSBE./PrizrenPress.com/