Gjykata Themelore e Prizrenit, Departamenti për Krime të Rënda, ia shqiptoi dënimin të akuzuarit Rajmond Ransi, prej 5 viteve burgim dhe dënimin me gjobë në shumën prej 500 euro, si bashkëkryerës, ndërsa për veprën e dytë armëmbajtje pa leje dënimin me gjobë në shumën prej 500 euro.
“I akuzuari së bashku me vëllain e tij të mitur, paraprakisht të përgatitur, me maska dhe të pajisur me kallashnikov ndërsa i mituri me shufër të metaltë dhe me automjetin e markës “Golf 6“ me targa 044-925-DG, ishin nisur në drejtim të pompës së derivateve “Petrol Company“ e cila gjendet në dalje të qytetit të Prizrenit në drejtim të Suharekës, hynë në kabinë ku ishin të dëmtuarit, R.N. dhe R.B. dhe duke i kërcënuar seriozisht me jetë, nga ata marrin shumën e të hollave në vlerë prej 1.427 euro dhe dy telefona mobil “LG” dhe “Iphone” dhe gjatë ikjes i akuzuari Rajmond gjuan në drejtim të dëmtuarve”, thotë zëdhënësja e Gjykatës në Prizren, Afërdita Kicaj.
Në dënimin me burg prej 5 vitesh do t’i llogaritet edhe koha e kaluar në paraburgim prej datës 25.04.2014 e deri në plotfuqishmërinë e aktgjykimit. /PrizrenPress.com/