Prokuroria e EULEX-it është duke hetuar profile të larta të vendit për krim të organizuar dhe korrupsion. Këtë e ka bërë të ditur në emisionin “Puls”, kryeprokurori i Prokurorisë Speciale të EULEX-it, Jonathan Ratel.
Raatel tha se është e pafalshme që njerëzit në pushtet ta dëmtojnë t ardhmen e këtij vendi.
“Ne do të shkojmë kudo dhe te secili që na çon ndjekja penale”, tha ai
“Ka në procedurë njerëz të niveleve shumë të larta … Ne ende nuk kemi ngritur aktakuzë, por mund të them se ka dosje shumë të rëndësishme”, tha Ratel, duke premtuar arrestime dhe gjykime të këtyre njerëzve të fuqishëm.
Ratel ka lavdëruar punën e Policisë së Kosovës, duke thënë se beson se ajo ka kapacitete të kryejë punën si duhet.
Ai tha se prokuroria është duke hetuar shumë raste të vrasjeve të pasluftës. /Telegrafi/
——————————————————
Ratel: Prokurorët dhe gjyqtarët duhet të lirohen nga frika
Ratel ka thënë se ka njerëz në funksione të larta që po e përdorin pushtetin për tu pasuruar, të cilët po e vjedhin të ardhmen e rinisë së këtij vendi dhe ne pikërisht me këtë çështje po merremi, raporton KTV.
Sipas tij, prokuroria speciale e Kosovës ka hetuar dhe po heton rreth 374 raste, përfshirë edhe ato që tashmë dihen.
“Është shumë shqetësuese që njerëzit që janë në pushtet janë kaq shumë të korruptuar”, tha ai.
Ratel tha se prokurorët dhe gjyqtarët vendorë po mbahen në një “mur” që u bën të padukshëm.
“Ai mur është mur i frikës. Ata duhet të lirohen nga kjo. Ata duhet të lirohen nga frika… “, tha ai.