Sahit F. Osmani
(Në 15-vjetorin e Pavarësisë)
1.
Linde me zemër shqiponje udhëve të luftës
Rritur djepeve me flatra shpuar nga plumbat
Nëpër beteja ushqyer me këngët e trimave
Me rreze diellore dimrit ia shkrive gjembat
Tokë e det e qiej mbushe me diellin e lirisë
Të atyre që ranë e t’u bënë kurorë pavarësie
Me lulkuqe rrethuar vulosur me emblemën e UÇK-së
Trup të lartësuar ngulitur në dhe të Dardanisë
2.
Sot me krenari e përmendim emrin tënd
Që na tejmbush shpirtin me frymë lirie
Të atyre që u flijuan për lirinë e shtrenjtë
Ku çdo pik? gjaku me lirinë sot po lulëzon
Statujat e lirisë si diell të shembëllejnë
Me përlindjen tënde shtetërore Kosovë
Armiku në sy s’guxon më as të të shikojë
Përflakja e shndritshme diellore e verbon!
3.
Me kurorë lavdie nga lulëkuqet e stërkuqur
sytë e zemrës vështrojnë diellin që shndrit
pastërtinë shpirtërore e trupin e papërlyer
ne njohëm vetveten dhe bota na njeh sot!