Restaurimi dhe konservimi i ndërtesave me rëndësi arkitekturale në Prizren ishte tema që u diskutua në programin e mëngjesit në Radio Televizionin e Kosovës (RTK) nga drejtori i Qendrës Rajonale për Trashëgimi Kulturore në Prizren, Samir Hoxha.
Ai tha se qyteti i Prizrenit njihet për trashëgimi kulturore, dhe është një nga qytetet më të frekuentuara nga të gjitha vendet e Kosovës, ku vizitohet nga shumë turistë të huaj.
Hoxha vuri në dukje se tashmë janë realizuar tetë projekte që kanë të bëjnë me restaurimin e shtëpive tradicionale.
Si projekt me rëndësi tëv vecnatë ai përmendi edhe restaurimin e shtëpisë së familjes Zhoriç në Prizren, ndërkaq edhe pastrimin e krojeve në Komunën e Prizrenit.
Sipas tij, Memorandumi i Mirëkuptimit i lidhur ndërmjet Qendrës Rajonale për Trashëgimi Kulturore në Prizren dhe Këshillit Danez për Refugjatë (DRC) mbështetur financiarisht nga Ambasada e Mbretërisë së Bashkuar e akredituar në Kosovë për restaurimin e shtëpisë së vjetër në Qendrën Historike të Prizrenit ka rezultuar të jetë tejet i suksesshëm.
Ndërtesa në fjalë gjendet në rrugën “Marin Barleti” prapa xhamisë së Sinan Pashës në Prizren dhe gjendja e saj ishte shumë e vështirë, andaj pas konsultave dhe një bashkëpunimi të ngusht të Qendrës Rajonale për Trashëgimi Kulturore në Prizren me donatorët është përzgjedhur nga Ambasada Britanike dhe DRC për restaurim në kuadër të programit “për kthim dhe integrim të qëndrueshëm” të personave të zhvendosur.
Ai tha se Qendra Rajonale për Trashëgimi Kulturore në Prizren përmes këtij memorandumi ka marrë për obligim të hartojë projektin e restaurimit si dhe të bëj restaurimin dhe konservimin e fasadës së jashtme të ndërtesës.
Fasada e shtëpisë së familjes Zhoriç është punuar në frymën neoklasike të dekoruar me profilime të ndryshme në gjithë sipërfaqen e saj. Materiali që është përdorur është llaçi gëlqeror. Gjatë viteve nga ndikimi i kushteve atmosferike dhe nga mos mirëmbajtja, fasada ishte dëmtuar mjaft shumë, andaj si rezultat i kësaj ka qenë i pashmangshëm intervenimi në këtë ndërtesë.
Drejtori Samir Hoxha theksoi se plaifikohen që të realizohen edhe 20 projekte të reja.