Lëvizja Vetëvendosje! ka vizituar Teqen e Halvetive në Prizren. Kandidati i VV-së për kryetar të Prizrenit, Arbër Rexhaj bashkë me kandidatët për asamble u prit nga udhëheqësi i Tarikatit Halveti për Kosovë, Sheh Abedin Shehu.
Rexhaj duke folur për gjendjen aktuale në Komunën e Prizrenit theksoi se ruajtja e trashëgimisë kulturore do të jetë njëra nga prioritetet në hartimin e politikave publike në Prizren.
“Integrimi i kulturës si sektor i rëndësishëm për zhvillim ekonomik lokal është një praktikë e re që bëhet edhe nga shtetet e zhvilluara dhe një trend i tillë duhet të aplikohet edhe në Prizren”, tha Rexhaj.
Sheh Abedin Shehu duke e falënderuar Lëvizjen Vetëvendosje! për vizitë, shprehu brengën e tij për rrezikimin e vazhdueshëm të objekteve të kultit si dhe trashëgimisë së pasur kulturore në Prizren. Ai kërkoi nga VV angazhim konkret në këtë drejtim.
“Mungesa e udhërrëfyesve turistik në Prizren është një problem që duhet zgjidhur sa më parë, duke pasur parasysh rëndësinë e turizmit kulturor në zhvillimin e ekonomisë lokale”, tha Sheh Abedin Shehu./PrizrenPress.com/