Kandidati i Lëvizjes Vetëvendosje! për kryetar të Prizrenit, Arbër Rexhaj ka ngritur shqetësimin e blerjes së votave. Ai tha se partitë politike në Prizren, nga tash kanë fiilluar t’i blejnë votat.
“Kohëve të fundit janë shtuar zërat se në qytetin tonë ka filluar të blihet vota e qytetarëve. Madje, ka pasur qytetarë të cilët kanë ardhur në zyret tona, më kanë takuar edhe mua dhe më kanë thënë se kane dashur t’ua blejnë votën. Ka pasur edhe të atillë, që na kanë treguar se ku kanë filluar ta blejnë votën”, ka thënë Rexhaj.
Ai ka kërkuar nga qytetarët që pavarëisht gjendjes së rëndë ekonomike, të mos e shesin votën e 3 nëntorit. “E kam parasysh se në çka na ka katandisur ky pushtet si ravijëzim edhe të pushteteve të kaluar. E di se në çfarë katandisje ekonomike janë qytetarët e Komunës sonë. E kuptoj varfërine ekstreme. Por, secili qytetar ka vullnetin e vet, prandaj shpreheni vullnetin tuaj, aty ku të doni, por mos e ç’njerëzoni vetën. Mos e shisni votën. Jepëni aty ku të doni. Por, ndihuni krenar, mos u frikësoheni, sepse çdo pushtet i padrejtë domosdoshmërisht është i dëstinuar të bie. Edhe Muja edhe Kryeziu do ta kenë fundin e vet. Mirëpo për ta askush nuk do të ndiej dhembje…”, ka thënë Rexhaj. /PrizrenPress.com/