“Truly nolen”, e cila është përfaqësuese e një kompanie amerikane dhe pjesë e ekipit punues, rifillon sot punën në spërkatjen kundër rriqrave në komunën e Malishevës.
Rispërkatja pritet të ndikojë pozitivisht në parandalimin e përhapjes së etheve hemorragjike -Krime Kongo, e rrjedhimisht edhe parandalimin e rasteve të mundshme të vdekjes. Të paktën kështu mendojnë zyrtarë të Ministrisë së Shëndetësisë. Përderisa, sot në disa fshatra të komunë së Malishevës vazhdon spërkatja kundër rriqrave rriqrave, zëdhënësi i kësaj Ministrie Faik Hoti, thotë se deri më tash për zvogëlimin e pasojave janë ndarë mbi 500 mijë euro.
“Ministria e Shëndetësisë sivjet ka ndarë 159 mijë euro për dezinsektim selektiv. Pastaj edhe 350 mijë euro tjera në sigurimin e terapisë për trajtimin e të prekurve dhe së fundi qeveria ka lejuar edhe 100 mijë euro tjera për zvogëlimin e pasojave nga ethet hemorragjike”, tha Hoti, transmeton RK.
Sipas Faik Hotit, tani është një fazë tjetër e dezinsektimit selektiv që po bëhet në komunën e Malishevës, Rahovecit dhe komuna të tjera që njihen si zona endemike për ethe hemorragjike.
“Kjo fazë ka për qëllim që vatrat që njihen ma intensive sa i përket paraqitjes së etheve hemorragjike, të përfshihen në një dezinfektim tjetër”, tha Hoti.