Unë nuk e votoj asnjë lloj koalicioni të LDK-së me PDK-në. Këtë e kam shprehur publikisht në paraqitjet e mia në media, por edhe këtë e kam thënë qartë edhe në Grupin Parlamentar të LDK-së, ka thënë deputeti Adem Salihaj.
Sipas Salihajt, Këshilli i Përgjithshëm i LDK-së, në mbledhjen e djeshme nuk ka votuar për koalicion me PDK-në.
“Asnjë anëtar i Këshillit të Përgjithshëm dje nuk ka qenë i njoftuar se është përgatitur për një lloj marrëveshje me PDK-në”, ka thënë Salihaj për Bota Press.
Ai kërcënon se kjo punë nuk ka marrë fund dhe se është Këshilli i Përgjithshëm i LDK-së që do të vendos për koalicionin me PDK-në. Salihaj beson se një koalicion i tillë nuk do të votohet në Këshillin e Përgjithshëm të LDK-së.
“Kam qenë gjithmonë kundër koalicionit me PDK-në, sepse është një parti e krimit, është parti që ka kryer krime dhe kryen ende në Kosovë dhe nuk bënë që të jemi bashkë me krimin”, ka thënë Salihaj. /BP/