Me mbikëqyrjen e gjendjes nga kamerat e vendosura në terren, në vijën e gjelbër kufitare mes Kosovës dhe Shqipërisë, numri i trafikimeve me qenie njerëzore dhe kontrabandës së mallrave është në rënie.
Megjithatë, problem kryesor mbetet kalimi ilegal në fshatrat kufitare. Kjo zonë e përgjegjësisë ka 90 kilometra kufi të gjelbër, si dhe kufirin ujor që mbikëqyret nga njësitet me varka.
90 kilometra vijë e gjelbër e kufirit Kosovë – Shqipëri kontrollohet 24 orë nga këto njësite të policisë së Kosovës. Togeri Shaban Osmanollaj thotë se problemet më të theksuara mbesin kalimet ilegale të kufirit, por nuk mungojnë edhe rastet e kontrabandës.
Në këtë zonë kufitare që nga viti i kaluar në terren janë vendosur kamera, gjë që ka bërë që numri i rasteve të kontrabandës të ulet.
Ndërsa, trafikimi me qenie njerëzore, nga vija kufitare, është bërë problem edhe në qarkun e Kukësit.
Ardhja e stinës së verës paraqet edhe një problem tjetër në këtë zonë; zjarrëvënie e qëllimshme.
Zona operatike e këtij njësiti, nis në kufi me Gjakovën deri në malet e Sharrit. Situata e krijuar në ditët e fundit në Maqedoni, nuk ka reflektuar në këtë pjesë të vijës kufitare. Në terren ka ende shumë borë, ndërsa me ndihëm e KFOR-it kufiri është mbikëqyrur edhe nga ajri. Me përmirësimin e motit, kalimet ilegale, peshkimi i paligjshëm bëhen edhe në vijën e kaltër. Për këtë policia ka në shërbim edhe varkat që internojnë në rastet e duhura./rtk/