Çdo serb është tronditur nga lajmi që Kosova ka nënshkruar MSA-në, duke iu dhënë drita e gjelbër për t’u bashkuar me BE-në!
Kështu nis një shkrim i gazetës serbe Telegraf, që flet për rrugën e integrimit evropian të Kosovës, dhe faktit se shtetësia e saj dalëngadalë po bëhet e pamohueshme edhe për Serbinë.
Kjo gazetë, tutje përmend edhe atë se Serbia përveç kësaj po shantazhohet edhe me faktin tjetër, atë të anëtarësimit në Kombet e Bashkuara. Dhe e gjitha kjo, me kushtin që shteti i drejtuar nga Nikolic e Vucic, të mund t’i hap negociatat për anëtarësim në BE.
Aty theksohet edhe situata me pesë vendet anëtare të BE-së, të cilat pavarësisht se nuk e kanë njohur Kosovën, nuk do të jenë pengesë për ratifikimin e MSA-së, pasi për dallim nga vendet tjera, kur shtetet e BE-së ratifikonin veç e veç MSA-të, në rastin e Kosovës, ajo do të nënshkruhet vetëm nga përfaqësuesja për Politikë të Jashtme të BE-së, Federica Mogherini. /lajmi.net//