Themeluesi i partisë ekstremiste Fronti Nacional në Francë, Jean-Marie Le Pen, tha se i vjen turp që e bija- Marine, e cila mban postin e kryetares së partisë- mban akoma mbiemrin e tij.
Le Pen tha se do kishte dashur që ajo të martohej, në mënyrë që të ndërronte mbiemrin sa më shpejt.
Sipas BBC, ai shtoi se nuk do e mbështesë të bijën në zgjedhjet presidenciale në vitin 2017.
Ky qëndrim i tij vjen pas një përplasje me të bijën.
Kjo e fundit e ka pezulluar nga partia e ekstremit të djathtë 86- vjeçari, pasi kishte përsëritur sërish se Holokausti është një detaj i historisë.
Marine Le Pen, 46 vjeç, ka tentuar që ta largojë partinë nga e kaluara raciste dhe anti- semitike.
Brenda pak kohësh do bëhet një kongres i jashtëzakonshëm për t’i dhënë fund funksionit të presidentit të nderit- të cilin e mban Le Pen që kur u largua si lider në vitin 2011.
Disa komentatorë sugjerojnë se ai mund të jetë më i rrezikshëm jashtë partisë se brenda saj.