Nga sot ka filluar zbatimi i urdhëresës së inspektoratit komunal, për mos ekspozim të mallit jashtë lokaleve të tyre afariste. Sipas shërbimit të inspektoratit, kjo urdhëresë, është duke u zbatuar nga shumica dërmuese e lokaleve, të cilët nuk po e ekspozojnë mallin jashtë objekteve të tyre.
Bardhyl Buçaj, shef i inspektorëve, ka deklaruar se “mbi nëntëdhjetë për qind e shitësve janë duke e zbatuar këtë urdhëresë të inspektoratit dhe gjatë vizitave të sotme në terren, kemi vërejtur se shitësit, janë duke e zbatuar këtë”.
“Atyre të cilët nuk e kanë zbatuar këtë urdhëresë, ju kemi dhënë vërejtjet e fundit dhe na nesër, asnjë shitës, nuk guxon ta ekspozoj mallin jashtë objektit, përkatësisht nuk guxon që malli për shitje të jetë i ekspozuar në ambient të hapur”, tha Buçaj.
“Kjo bëhet me qëllim të mbrojtjes së konsumatorit dhe vëmendje e veçantë ju kushtohet gjërave ushqimore, por edhe gjërave tjera, të cilat konsumatori i blen”, tha Buçaj.