Ekipet e kërkim-shpëtimit nxorën edhe dy trupa të tjerë nga rrënojat e ndërtesës së shembur në Florida, duke e çuar në 11 numrin zyrtar të të vdekurve, ndërsa 150 persona ende janë në listën e të zhdukurve, katër ditë pas fatkeqësisë.
Reshjet e shiut i penguan përpjekjet e autoriteteve për të gjetur më shumë trupa nën rrënojat e ndërtesës që dikur kishte 12 kate e 156 njësi banimi. Kjo mund të jetë fatkeqësia më e madhe në historinë e ShBA-së sa i përket shembjes së paqëllimtë të një strukture.Ende asnjë i mbijetuar nuk është nxjerrë nga rrënojat e ndërtesës që ndodhej në qytezën Surfside, afër Miamit, shkruan Reuters, transmeton Gazeta Express.
Në përpjekjet për nxjerrjen e trupave po marrin pjesë edhe ekspertë nga Izraeli e Meksika, të cilët po përdorin vinça, qen të trajnuar e skanerë me rreze infra të kuqe për të gjetur ndonjë shenjë jete nën rrënoja, ndonëse shpresa po venitet me kalimin e kohës.
Shkaktari i shembjes së ndërtesës është ende duke u hetuar, por autoritetet po përqendrohen te disa vërejtje në strukturë, të cilat ishin identifikuar në një raport të inxhinierëve më 2008.