Pas disa raportimeve në media se brenda Parkut të Liqenit në Tiranë është bërë një rrethim, disa aktivistë të shoqërisë civile kanë paralajmëruar protestë më 20 shkurt.
Në rrjetin social ‘Facebook’ ka nisur një thirrje për kryetarin e Bashkisë së Tiranës Erion Veliaj, e shoqëruar me një foto ilustruese.
“Shkule ose do e shkulim vet”, është thirrja në rrjetin social drejtuar kryebashkiakut Veliaj.
“Me 1001 hallet që ka Tirana, kryetari i bashkisë vendos të rrethoje parkun e liqenit për të ndertuar një park tjetër brenda. Në 1001 hapesira të mundshme jashte parkut ku mund të bëhej ky ndërtim, kryetari i bashkisë vazhdon avazin e Fikut arrogant dhe e vendos pikërisht aty ku është vendi i fundit që duhet vendosur. Ato rrethime duhet të shkulen menjëherë!”, thuhet në thirrjen e përhapur në rrjetin social.
Zona brenda parkut të liqenit është rrethuar pasi do të bëhet një ndërtim me vlerë 78 milionë lekë të reja.
Sipas projektit, do të ndërtohet një park lojërash për fëmijët, ku parashikohet të priten disa pemë. /Mapo