Kryeministri Australian,Tony Abbot, ka kërkuar dënim maksimal pas shfaqjes në rrjetet sociale dhe media të një fotoje vërtet dramatike. Një fëmijë, që raportohet të jetë djali i një ish të dënuari me kombësi australiane, teksa mban në duar kokën e prerë të një siriani.
Kjo foto u postua në Twitter nga vetë babai i vogëlushit, Khaled Sharrouf, i cili disa herë ka bërë plane për sulme në Australi ndërsa tani është bashkuar me militantët e shtetit islamik IS, në Siri. Kryeministri Abbott tha se këto imazhe tregojnë qartë sesa barbarë dhe c’njerëzorë janë militantët e ISIS.
Në këto foto tregohet një djalosh, jo më shumë se 10 vjeç, veshur sportive, i qeshur, por që në duar mban një kokë të prerë.
Foto shoqërohet me shkrimin “Ky është djali im”, që tregon krenarinë e babait terrorist për këtë akt guximi që djali i tij ka shfaqur. Fotoja është shkrepur në qytetin jugor sirian, të Raqa.
Në një tjetër foto, Sharrouf shfaqet me veshje ushtarake dhe përkrah tij janë me po të njëjtën veshje edhe fëmijët e tij të mitur.
“Ajo me të cilën kemi të bëjmë është shteti islamik, jo vetëm një grup terrorist. Është një ushtri e tëtë terroriste”, tha Abbott për radion australiane në Hollandë, atje ku po zhvillohen diskutimet për misterin e avionit të rrëzuar nga një raketë disa javë më parë, MH17, në kufirin lindor mes Ukrainës dhe Rusisë.
Sipas Abbott, këto foto nuk duhet të shqetësojnë vetëm Lindjen e Mesme por mbarë botën. Khaled Sharrouf, një emër i njohur për drejtësinë australiane, e kishte të ndaluar të dilte nga Australia por ka shfrytëzuar pasaportën e të vëllait për të udhëtuar drejt Sirisë bashkë me familjen.
Australia ka lëshuar një mandat arresti ndërkombëtar për të dhe për një tjetër shtetas australian, Mohamed Elomar, pasi të dy janë shfaqur duke mbajtur në duar koka të prera të ushtarëve sirianë.
160 qytetarë australianë besohet se janë bashkuar me luftimet e militantëve islamikë në Lindjen e Mesme./oranews/