Teatri Kombëtar i Kosovës do të jetë së paku edhe një javë pa drejtor të përgjithshëm, ndërkaq, deri në zgjedhjen e kreut të ri, ky institucion do të vazhdojë të udhëhiqet nga ushtruesi i detyrës së drejtorit, Kamuran Goranci.
Ministria e Kulturës kohë më parë ka hapur konkursin për drejtor të përgjithshëm të Teatrit Kombëtar. Bazuar në ligjet në fuqi, konkursi është paraparë të mbyllet sot (e martë) në orën 16:00, por një gjë e tillë nuk ka ndodhur.Meqenëse për ta marrë “timonin” e Teatrit Kombëtar kanë konkurruar vetëm dy veta, dhe jo pesë, siç kërkohet me ligj, zyrtarët përgjegjës në Ministrinë e Kulturës kanë marrë vendim që ta shtyjnë konkursin edhe për një javë.