Ka disa ditë që në disa lokacione të Suharekës ka shpërthyer zjarri. Pasi që kjo komunë është më e goditura nga zjarret, sot me mëngjes kryeministri, Albin Kurti ka shkuar për vizitë.
Kurti pasi ka mbajtur një takim me kryetarin e Suharekës, Bali Muharremaj, ka shkuar në fshatin Studençan për të parë nga afër gjendjen.
Ndërkaq, Ministria e Bujqësisë, Pylltarisë dhe Zhvillimit Rural, ka ftuar qytetarët të kenë kujdes maksimal në ruajtjen e pyjeve, të natyrës dhe mjedisit.
“Është fjala për paraqitjen e zjarreve, që po shfaqen gjithandej në Kosovë, nga të cilat janë duke u dëmtuar pyjet, tokat pyjore, por edhe sipërfaqe tjera rurale e urbane”, thuhet në njoftim.
Ministria e Bujqësisë ka ftuar të gjitha institucionet përgjegjëse duke filluar nga komunat, Njësitë Komunale të Agjencisë së Pyjeve të Kosovës, shërbimin e zjarrfikësve dhe policinë për koordinim të veprimeve, si dhe kujdes të shtuar në parandalimin e zjarreve dhe mobilizim në shuarjen e tyre.