Ministri i Integrimit Evropian, Bekim Çollaku, ka vlerësuar se liberalizimi i vizave për qytetarët e Kosovës duhet të ndodhë këtë vit.
Ai në një intervistë për “Epokën e re” ka thënë se askush më nuk ka asnjë arsyetim racional për ta vonuar këtë proces. Pavarësisht rrethanave jo të mira në të cilat gjendet Bashkimi Evropian, Çollaku ka thënë se BE-ja dhe shtetet anëtare duhet t’i japin fund izolimit të qytetarëve të Kosovës.
Sipas tij, institucionet e Kosovës janë duke bërë gjithçka me lobimin e tyre për ta arritur këtë synim.
Çollaku ka mohuar mundësinë që ta lërë postin e ministrit për të kaluar në kabinetin e presidentit Hashim Thaçi, duke bërë me dije se aktualisht është i fokusuar në përmbylljen e procesit të liberalizimit të vizave për qytetarët e Kosovës. /Epoka e re/