Në gjimnazin “Xhelal Hajda – Toni” në Rahovec, nga qershori, lëndën e sociologjisë po e ligjëron një profesor tjetër.
Ramadan Krasniqi ka zënë vendin e një mësimdhënësi që u pensionua.
Këtë detyrë, e mori nga Drejtoria Komunale e Arsimit në Rahovec, për të plotësuar numrin e orëve, raporton KTV.
Avni Morina thotë që Ramadan Krasniqi është i kualifikuar për të ligjëruar këtë lëndë, ndonëse në konkursin e muajit shkurt, ky i fundit ishte pranuar si mësimdhënës për lëndë juridike në shkollën “Selajdin Mullabazi – Mici”.
Sipas dokumenteve që Krasniqi i ka dorëzuar për vendin e punës, rezulton që ai ka gradën master në marrëdhënie ndërkombëtare dhe diplomaci e po ashtu, bachelor në shkenca politike e administratë publike, çka e bën atë joadekuat për të ligjëruar lëndën e sociologjisë.
Kjo, bazuar në udhëzimin administrativ për normativ mbi kuadrin e arsimit profesional, sipas të cilit, këtë lëndë mund ta ligjërojnë vetëm ata që kanë të përfunduar fakultetin filozofik, departamentin e sociologjisë.
Por, Ramadan Krasniqi, përmes telefonit i ka thënë KTV-së se është i kualifikuar të ligjërojë edhe lëndën e sociologjisë.
Kohavisioni ka provuar të bisedojë me drejtoreshën e shkollës “Xhelal Hajda – Toni” në Rahovec, por e njëjta nuk ka pranuar të flasë, duke thënë se është e zënë me takime.