Akademikut Esat Stavileci, i cili u nda nga jeta të shtunën, do t’i jepet lamtumira e fundit sot me ç’rast në shenje respekti për jetën dhe veprën e tij do të mbahet një mbledhje komemorative në Prishtinë dhe një Gjakovë, në Gjakovë do të bëhen edhe homazhe, ndërsa varrimi i tij do të behët në ora 17:00 në varrezat e qytetit të Gjakovë.
Mbledhja komemorative do të mbahet duke filluar nga ora 10:00 në mjediset e Akademisë së Shkencave dhe të Arteve të Kosovës, ndërsa homazhet nga ora 10:30-11:30 do të bëhen në mjediset e kësaj akademie.
Në Pallatin e kulturës “Asim Vokshi” në Gjakovë nga ora 14:00 do të mbahet mbledhja komemorative, ndërsa homazhet do të bëhen nga ora 14:30.
Esat Stavileci u nda nga jeta, pasditen e së shtunës, ndërsa vdekja e tij është cilësuar si humbje e madhe për familjen, për kolegët dhe miqtë e shumtë anë e mbanë Kosovës dhe trojeve shqiptare, si dhe për shkencën dhe akademinë.
Esat Stavileci ka lindur më 11 korrik 1942 në Gjakovë, ku e kreu shkollimin fillor dhe të mesëm, ndërsa Fakultetin Juridik në Prishtinë. Studimet pasuniversitare i vijoi dhe i mbaroi në Fakultetin Juridik të Universitetit të Zagrebit.
Studimet e Larta të së Drejtës Krahasimtare i vijoi në disa qendra të tjera evropiane. Doktoroi në Fakultetin Juridik të Universitetit të Sarajevës në vitin 1974.
Prej vitit 1965 deri në pensionim punoi profesor në Fakultetin Juridik të Prishtinës, ku edhe pas pensionimit ishte i angazhuar në studimet master dhe të doktoraturës. Krijimtaria e tij shtrihet në shumë fusha të interesimit shkencor, veçanërisht në ato juridike-kushtetuese, në fushën e sistemeve politike krahasimore, të administratës dhe të administrimit publik në përgjithësi, të metodologjisë së shkencave shoqërore dhe juridike dhe në fushën e terminologjisë juridike.