Filarmonia e Kosovës so organizon koncert të rregullt të Orkestrës Simfonike. Drejtori i Filarmonisë, Baki Jashari, ka thënë se ky koncert realizohet në bashkëpunim, tashmë tradicional, me festivalin “Ditët e Muzikës Kosovare”, që organizohet nga Shoqata e Kompozitorëve të Kosovës.
Vepra qendrore e programit, njëherësh edhe premierë kosovare, do të jetë “Simfonia 83” e shkruar nga kompozitori Zeqirja Ballata, mes viteve 1982-83, për nder të shënimit të 70-vjetorit të Pavarësisë së Shqipërisë, transmeton KTV. Kjo mbrëmje po ashtu përfshin dy vepra të Rexho Mulliqit “Filigranet e Prizrenit” për orkestër harkore dhe “Simfoninë nr.1”.
Orkestrën Simfonike të Filarmonisë së Kosovës do ta drejtojë dirigjenti i njohur shqiptar, Ermir Krantja, i cili ka thënë se kjo do të jetë një mbrëmje jubilare e bashkimit të veprave të dy kompozitorëve shumë të mëdhenj.
Koncerti nis prej orës 20:00 në Sallën e Kuqe të Pallatit të Rinisë.