Deklarata e Ministrit Aleksandar Jablanovic dhe vendimi i fundit për Trepçën do t’i mbledhin sot në Prishtinë qytetarët nga vende të ndryshme, në marrshin protestues që fillon në orën 14:00 tek Biblioteka Kombëtare dhe përfundon me kërkesat përballë ndërtesës së Qeverisë.
Protestuesit kërkojnë shkarkimin e Ministrit për Kthim dhe Komunitete, pasi kishte fyer rëndë nënat e të zhdukurve në Gjakovë, duke i quajtur “egërsira”.
Ata, po ashtu, do të kërkojnë mbrojtjen e Trepçës, pasi konsiderojnë se me heqjen e saj nga Ligji për Ndërmarrjet Publike ka lënë Kosovën pa këtë kombinat.
Protesta është thirrur dhe mbështetur nga tri partitë opozitare Vetëvendosje, AAK, Nisma, si dhe nga organizatat joqeveritare.
Forcat e rendit, ndërkohë, kanë marrë pozicionet e tyre, për të qenë në gjendje gatishmërie në rast të eskalimit të kësaj proteste. / Politiko.net