Përmes bojkotit ata po synojnë t’i ikin pagesës së semestrit prej 50 euro, me shpresën se pas 1 majit semestrin do ta paguajnë 50 për qind më lirë
Vendimi i Qeverisë së Kosovës për ulje të çmimit për studentët e Universitetit të Prishtinës, ka bërë që shumë studentë të këtij universiteti të bojkotojnë afatin e prillit. Përmes bojkotit ata po synojnë t’i ikin pagesës së semestrit prej 50 euro, me shpresën se pas 1 majit semestrin do ta paguajnë 50 për qind më lirë.
Ardita Gashi, studente e vitit të dytë në Universitetin e Prishtinës, thotë se qëllimisht nuk e ka bërë regjistrimin e semestrit me kohë. Ajo po shpreson se pas 1 majit semestrin e papaguar do ta paguajë përgjysmë më lirë.
“Për shkak të mosregjistrimit të semestrit më ka ikur edhe afati i prillit për paraqitje të provimeve. Mirëpo po shpresoj se pas 1 majit neve që nuk e kemi regjistruar semestrin do të na mundësojnë që ta regjistrojmë atë me lirë”, ka thënë studentja Gashi. Ajo ka shtuar se edhe shumë kolegë të saj kanë vepruar si ajo duke e shtyrë regjistrimin e semestrit me shpresën se pas 1 majit do ta regjistrojnë me një çmim më të lirë.
(Tribuna)