Dy zyrtarë të Qendrës Kryesore të Mjekësisë Familjare në Suharekë, dy ditë më parë me anë të video-mesazheve kanë bërë thirrje të votohet kryetari aktual Bali Muharremaj në zgjedhjet e paraparë të mbahen pas një muaji.
Bërja e këtyre video-mesazheve me anime politike pak kohë para hapjes së fushatës zgjedhore, po shihet e dëmshme për këtë proces nga opozita.
”Ne si LDK jemi shumë të shqetësuar me sjelljen e zyrtarëve që janë punojsë të QKMF-së e të cilët kanë kontratë dhe në qëllim të kësaj bëjnë favore”, tha Ardian Shala nga kjo parti.
Madje, një veprim i tillë është i ndaluar me ligj.
Gjatë ditës kontakti me dy mantel bardhët ishte i pamundur.
Njëjtë ishte edhe me ud. e drejtorit të kësaj QKMF-je e koordinatoren e kësaj qendre, Salë Bytyqi, për të cilën Klani mëson se ishte në detyrë gjatë bërjes së këtyre video-xhirimeve.
Ndërsa, nga Lëvizja Vetëvendosje për këto sjellje të mantel bardhëve, gishtin ia drejtojnë kryetarit aktual të Suharekës, Bali Muharremaj.
Ndërsa, Muharremaj mohon të ketë ushtruar ndikimin e tij tek këta punëtorë shëndetësorë.
”Demokraci, kanë drejt të shprehen si të donë. Ne që udhëheqim herë na shajnë e herë na lavdërojnë. QKMF ka afro 250 punëtorë, dhe është e drejt e tyre, unë nuk vendosi”, tha Muharremaj.
Ky tha se video të ngjashme ka me dhjetra në telefonin e tij.