Të gjitha rrugët në Komunën e Malishevës janë të kalueshme dhe nuk ka probleme, përfshirë edhe rrugët në fshatrat e thella malore.
Kështu ka bërë të ditur kjo komunë përmes një komunikate për media, ndërsa ka theksuar se edhe përkundër reshjeve të vazhdueshme të borës në dy ditë e fundit, rrugët janë të kalueshme.
Të gjitha rrugët në zonat malore janë inspektuar mbrëmë dhe sot nga nënkryetari i Komunës së Malishevës, Hajdin Berisha, i cili është takuar edhe banorët e këtyre zonave.
Sipas nënkryetarit Berisha, “rrugët janë të kalueshme, përfshi edhe zonat e thella malore, sidomos në fshatrat që shtrihen në Malet e Berishës, ku kompania përgjegjëse për mirëmbajtjen e rrugëve gjatë dimrit, dje pasdite, mbrëmë dhe gjatë paradites së sotme, në vazhdimësi ka bërë pastrimin e rrugëve nga bora”.
Gjatë vizitës së sotme në fshatrat Berishë dhe Fshat i Ri, dy nga fshatrat më të thella, nënkryetari Berisha, është takuar edhe banorët, të cilët janë shprehur të kënaqur me mirëmbajtjen e rrugëve, pasi në asnjë rast nuk janë bllokuar nga bora, edhe pse temperaturat janë të ulëta në këto fshatra dhe reshjet e borës janë më të mëdha.