Shkruan: Enver Sulaj
E di
Fjalët mund të zënë myk e gjuha të lidhet nyjë
Asgjë s’pipëtin sot as kur stuhia rrëzon malin
Ti vazhdo ritin e moçëm
Pa ditur se te Sokaku i të marrëve ne shohim veten
E gjunjtë na këputen e s’na mbajnë as kalldrëmet
As shkallët prej druri të kalbur
Ndër buzë më dridhet vargu e bimbashi bie përtokë
Kë të këndoj më parë Çerçiz Topullin, Musine Kokalarin…
Apo më mirë të pi një kafe me raki shtëpie
Aty në mes të tri rrugëve
Sa për të mbytur angështinë e mallit për ty
Po largohem e s’di vërtet a të pashë apo më bënë sytë
Rrugët s’paskan ndërruar emrat, as ngjyrat
Janë po ato-me madhështinë e çmendurinë
Herën tjetër
Do të rri më gjatë
Ta shoh edhe natën si të rri në trup
Gjirokastër, 3 maj 2015