Bordi mbikëqyrës për menaxhimin e objekteve të sportit dhe të kulturës në Prizren i ka rekomanduar Kuvendit të Komunës që të ndërmarrë hapa konkretë për përmirësimin e gjendjes aktuale në Shtëpinë e Kulturës dhe Teatrin Profesionist të qytetit, shkruan Koha Ditore.
Në mbledhjen e fundit të këtij Bordi, ku kanë qenë të pranishëm edhe përgjegjësit e Teatrit dhe të Shtëpisë së Kulturës, është vendosur që Komunës t’i dërgohen rekomandimet në gjashtë pika, të cilat do ta zgjidhnin problemin e financimit të këtyre dy institucioneve që veprojnë në të njëjtën ndërtesë.
Në shkresën e kryetarit të Bordit, Kujtim Gashi, që u është adresuar zyrtarëve komunalë të Prizrenit, është kërkuar që stafi i Shtëpisë së Kulturës “Xhemajli Berisha” të menaxhohet nga Teatri i Prizrenit dhe kësisoj anëtarët e stafit të jenë punëtorë të teatrit.
Po ashtu rekomandohet që shpenzimet komunale dhe administrative në këtë rast t’i marrë Teatri dhe punëtorët- që i bie të jenë 10 aktorë e 6 punëtorë të Shtëpisë së Kulturës- të paguhen në kuadër të listës së përbashkët.