Lëvizja “Vetëvendosje”, në Malishevë dhe burime të tjera nga kjo komunë pretendojnë se ka pasur shkelje ligji në tenderin për rrethojën e gjimnazit “Hamdi Berisha”.
Sipas tyre, punimet në vënien e kësaj rrethoje janë kryer në mars, ndërkohë që njoftimi për dhënie të kontratës, në faqen zyrtare të Komisionit rregullativ të prokurimit është publikuar më 10 prill të këtij viti. “Kjo paraqet shkelje të rëndë të procedurave të prokurimit, pasi që nuk ka kurrfarë logjike që pasi të kryhen punimet të shpallet fituesi i tenderit”, ka thënë Muhamet Bytyçi, anëtar i KK të Malishevës nga “VV-ja.
Vetë kreu i Komunës, Ragip Begaj, ka thënë se ky tender ka shkuar krejt në mënyrë të rregullt. “Krejt dokumentacioni për këtë tender është në rregull dhe akuzat vijnë nga njerëz që u është prekur interesi personal, s’ka asgjë tjetër këtu”, ka thënë Begaj/Koha Ditore/