Me rastin e 6 vjetorit të pavarësisë së Kosovës, kryeministri Hashim Thaçi tha se kjo është festë e unitetit politik, kombëtar e qytetar, është dita kulmore e përpjekjeve për liri e pavarësi. Në mbledhjen e Qeverisë, Thaçi tha se 6 vjetori i pavarësisë Kosovën e gjen me 106 njohje, ndërsa shprehu bindjen e thellë se edhe njohja nga Serbia nuk do të jetë e largët.
Kryeministri Hashim Thaçi në mbledhjen e Qeverisë së Kosovës, e vlerësoi 6 vjetorin e pavarësisë së Kosovës, ditë të finalizimit të aspiratave të popullit të Kosovës për liri dhe pavarësi. Ai shprehu besimin e plotë se më 17 shkurt do të ketë kudo një atmosferë festive konform agjendës shtetërore. Thaçi kujtoi me këtë rast të gjithë të rënët për lirinë e Kosovës, ndërsa tha se 6 vjetori i pavarësisë, Kosovën e gjen me subjektivitet shtetëror më të fortë, e gjen me 106 njohje dhe gjithnjë më afër liberalizimit të vizave dhe perspektivës euroatlantike. Edhe njohja nga Serbia, sipas kryeministrit Thaçi, nuk është e largët.
“Njohjet po shtohen, por unë kam besim të plotë se edhe njohja nga vetë Serbia do të ndodhë në të ardhmen jo të largët, paralelisht me procesin integrues evropian”, u shpreh Thaçi.
Kreu i Qeverisë, foli edhe për raportimin e tij në Këshillin e Sigurimit të OKB-së, duke treguar se ka raportuar për progresin, reformat, fqinjësinë e mirë me të gjitha vendet dhe perspektivën ekonomike të vendit.
“Gjithashtu prezantuam të arriturat e përgjithshme në muajt e fundit dhe është një vlerësim i përgjithshëm edhe i anëtarëve të Këshillit të Sigurimit se ky proces duhet të vazhdohet dhe Qeveria e Kosovës dhe institucionet e vendit janë të vendosura që të lëvizin përpara me progres të pandalshëm”, tha ai.
Ndërkohë, duke folur për takimin me kryeministrin e Serbisë Ivica Daçiq në Bruksel me ndërmjetësimin e baroneshës Ashton, Thaçi tha se marrëveshja për funksionalizimin e sistemit të drejtësisë është arritur në parim, ndërsa pritet ditëve të ardhshme të finalizohet në Bruksel.
“Kam besim të plotë se me funksionalizimin e sistemit të drejtësisë, do të kemi një funksionalizim të tërësishëm edhe në pjesën veriore të Kosovës, në veçanti tash pas organizimit të zgjedhjeve lokale për herë të parë”, tha ai,shkruan rtk.
Thaçi theksoi se marrëveshja për funksionalizimin e sistemit të drejtësisë në veri, është në përputhje të plotë me kushtetutën dhe ligjet e Kosovës si dhe me marrëveshjen e 19 prillit.