Ndonëse i përuruar javën e kaluar rrjeti i ujësjellësit të KRU “Radoniqi”, në 3 prej pesë fshatrave ende nuk është në funksion.
Banorët e fshatrave Guri i Kuq, Palluzhë dhe Çifllak të Rahovecit, janë ankuar se kanë mbetur pa ujë të pijshëm, ndërkohë që ujë kanë vetëm fshatrat Kramovik dhe Dabidol, shkruan Koha Ditore.
Këtë nuk e kanë mohuar as zyrtarë të Komunës dhe ata të “Radoniqit”, të cilët japin arsyetime të ndryshme përkitazi me mungesën e ujit.
Banori i fshatit Guri i Kuq,Maliq Fetahu, thotë se e kanë lëshuar rrjetin e ujësjellësit për 2 fshatra, por kjo nuk vlen për fshatin tonë. Arsyeja sipas tij qëndron se në disa pjesë të rrjetit gypat janë këputur.
“Zyrtarë të “Radoniqit” janë në dijeni për këtë problem. I kam njoftuar me shkrim, por deri tashti nuk kam marrë kurrfarë përgjigje”, ka thënë Fetahu.