Turqia dhe grupet e armatosura, besnike të Ankarasë mund të fillojnë një operacion ushtarak në veri të Sirisë të martën. Kështu tha një burim i njohur me këtë çështje.
“Turqia synon të nisë një operacion ushtarak kundër forcave siriane nesër dhe udhëzoi grupet opozitare që të përgatiten për operacionin”, deklaroi burimi duke shtuar se operacioni do të fillojë në disa drejtime.
Javën e kaluar parlamenti turk ratifikoi një mocion për të zgjatur autorizimin për operacionet ndërkufitare kundër terrorizmit në Siri dhe Irakun Verior edhe për dy vite të tjera.
Siria e ka kundërshtuar këtë vendim. Turqia ka kryer tre operacione të mëdha ushtarake në veri të Sirisë mes viteve 2016 dhe 2019. /Abcnews.al