Libri “Publicistika në luftë e paqe dhe arti poetik i Qazim Thaçit” i autorit Gëzim Ajgeraj është promovuar mbrëm në Universitetin “Ukshin Hoti” në Prizren.
Redaktori i librit, Bedri Halimi dhe recensenti Nexhat Çoçaj, thanë se në këtë botim, autori në këtë libër, përshkruhen kronologjikisht raportimet e gazetarit Qazim Thaçi.
“ Autori përmbledhe raportimet në periudha të ndryshme, përfshirë kohën më të vështirë për shqiptarët e Kosovës, para dhe gjatë luftës, si dhe krijimet e tij letrare të Thacit”.
Për veprimtarinë e gazetarit Qazim Thaçi, folën edhe dy deputetët e Parlamentit të Kosovës nga Prizreni, Nait Hasani dhe Zafir Berisha.
Ata, vlerësuan angazhimet e jashtëzakonshme të personazhit të librit në informimin e drejtë për ngjarjet e kohës së luftës.
Edhe bashkëveprimtarët dhe bashkëvendasit e Qazim Thaçit, Skender Morina dhe Osman Qerreti, vlerësuan lartë punën e palodhshme të personazhit të librit në shërbim të interesave të popullit dhe kombit në kohët e rënda që kaloi Kosova.
Ndërkaq personazhi që i dedikohet ky libër, Qazim Thaçi, falënderoi të gjithë ata që po e respektojnë veprimtarinë e tij jetësore si gazetar dhe poet.
“Në libër ka mundur të ketë edhe përshkrime të shumë ngjarjeve”, tha ai.
Autori i këtij libri, Gëzim Ajgeraj, për shkak se ndodhet në Zvicër , nuk ka mundur që të jetë i pranishëm në përurimin e librit të tij më të ri, por se përmes një letre ka falënderuar të gjithë ata që e kanë ndihmuar atë në daljen në dritë të këtij botimi. /tvpz/