Kandidati i Partisë Demokratike të Kosovës (PDK) për kryetar të komunës së Therandës, Ramë Vataj dhe ekipi i tij, kanë vazhduar fushatën zgjedhore në fshatin Duhël.
Vataj u ka premtuar banorëve të këtij fshati, se do ta ndërtojë një shkollë të re qysh në vitin e parë të mandatit të tij si kryetar komune. Po ashtu, Vataj premtoi se do ta rregullojë edhe rrjetin e vjetruar dhe të dëmtuar elektrik, pastaj rrugët e lagjeve si dhe ujësjellësin dhe kanalizimin e këtij fshati të harruar nga komuna e Therandës.
Në këtë tubim elektoral, Vataj ka thënë se gjatë mandatit të tij qeverisës do të nisë një program që ka për qëllim dhënien e tokave me qira për bujqit që duan të merren me bujqësi, në mënyrë që t’i jepet hov zhvillimit të bujqësisë në këtë komunë, dhe ky program, sipas Vatajt, mund të jetë edhe një shans i mirë për banorët e Duhlës. Kandidati i PDK-së, Ramë Vataj po ashtu ka thënë se në mandatin katërvjeçar të qeverisjes, komuna do t’i ulë taksat për të gjitha ato biznese që punësojnë më shumë se dhjetë punëtorë.