“Yue Madeleine Yue” u shfaq premierë nga trupa e aktorëve të teatrit Bo Sahne dhe siç ka njoftuar qendra Multimedia, është me gjasë drama e parë shqipe që luhet nga një teatër profesionist në Turqi
Tragjikomedia “Yue Madeleine Yue” e dramaturgut kosovar Jeton Neziraj është shfaqur të enjten mbrëma premierë në teatrin Bo Sahne të Stambollit, ka bërë të ditur qendra Multimedia në Prishtinë.
Drama kosovare është përkthyer në gjuhën turke nga Senem Cevher dhe është inskenuar për publikun turk me titullin “Büyük ?ehir” .
Shfaqja është prodhim i aatiyatro, dhe vjen me regjinë e Arif Akkaya. Në të luajnë aktorët: At?lgan Gümü?, Bekir Çiçekdemir, Berkin Özuyan?k, Esin Do?an, Nur Eraslan e ?eyla Halis.
“Yue Madeleine Yue” (Büyük ?ehir) do të qëndrojë në repertorin e teatrit Bo Sahne edhe në muajt në vazhdim, por ajo do të shfaqet edhe në skena të teatrove tjera nëpër Turqi.
“Yue Madeleine Yue” është me gjasë drama e parë shqipe që luhet nga një teatër profesionist në Turqi, ka njoftuar qendra Multimedia.
“Yue…” është shkruar në vitin 2011. Në qendër të saj është një familje rome e kthyer me forcë nga Gjermania në Kosovë. Të ndodhur në një realitet të ri, atyre tani u duhet të ballafaqohen me sfidat e shtetit të sapolindur. Vajza rome, Medlin, një ditë bie në një gropë të hapur nga një kompani ndërtimi. Dhe derisa vajza e mbetur në koma, lufton me vdekjen, babai i sajë, në përpjekje për të kërkuar drejtësi, ballafaqohet me zyrtarë byrokratë, biznesmenë, policë e punëtorë ambasadash.
Kjo është një dramë politike për pasluftën kaotike në Kosovë, por, para së gjithash, është një dramë për romët e padëshiruar në Evropë. Larg atyre stereotipeve për romët, larg atij ekzotizmit që përcjellë zakonisht temat rome, “Yue Medlin Yue” është një dramë intelegjente që shqyrton në mënyrë të shkëlqyeshme procesin emocional nëpër të cilin sot kalojnë me mijëra rom të Evropës, të cilët u nënshtrohen proceseve të dhunshme të ri-atdhesimit.
“Yue…” për herë të parë është prodhuar nga Qendra Multimedia e Prishtinës, me regji të Blerta Nezirajt, kurse ka pasur premierën botërore në teatrin austriak “Volkstheater”, ku është dhënë në kuadër të festivalit “Die Besten aus dem Osten: Folge 10”, me datë 24 dhe 25 shkurt 2012. Pos në Kosovë, kjo dramë është vënë në skenë edhe vitin që shkoi, nga Lucerner Theater. Deri më tash, “Yue Madeleine Yue”, është përkthyer në anglisht, frëngjisht, turqisht, gjermanisht dhe kroatisht./KultPlus.com