Lëvizja Vetëvendosje akuzon pushtetin lokal të Prizrenit, që udhëheqet nga PDK-ja, për shantazh dhe keqpërdorime.
Shembull i marrin deklaratat e ish-drejtoreshës, Vjollca Kabashi.
Komunikata e plotë
Qeverisja e PDK-së po karakterizohet si qeverisje e shantazhit, keqpërdorimeve dhe kërcënimeve
Pushteti lokal në Prizren i udhëhequr nga PDK, vazhdon me sjellje arrogante e në kundërshtim me ligjet në fuqi. Qeverisja lokale është shndërruar në qeverisje të një grupacioni politik që nuk njeh procedura dhe transparencën, nuk respekton integritetin dhe dinjitetin e qytetarëve, shërbyesve civil por së fundmi pamë që edhe një drejtoreshë e kësaj qeverisje dha dorëheqje për shkak të kërcënimit, shantazheve dhe detyrimit për të nënshkruar pagesa të jashtëligjshme.
Ky nuk është rasti i parë i tillë sepse siç kemi parë në media, më herët kryetari Totaj me bashkëpartiakët e tij, kanë kërcënuar e zhantazhuar edhe shërbyes civil duke i bërë presion për vendime të kundërligjshme që i shkojnë në favor grupeve të caktuara të lidhura me partinë në pushtet. Kjo qeverisje ka mungesë të madhe të respektimit të ligjshmërisë në vendimarrjen e tyre për kompetencat të cilat i ushtrojnë.
Dorëheqja e djeshme e zonjës Vjollca Kabashi nga pozita e drejtorit të Drejtorisë së Punës dhe Mirëqenies Sociale në Prizren (DPMS), shpërfaq edhe më shumë mendësinë e kësaj partie së cilës i takon kryetari aktual.
Detyrimi i saj për të nënshkruar një pagesë të kundërligjshme përmes kërcënimit dhe shantazhit është alarm edhe për Prokurorinë Themelore në Prizren e cila duhet të aktivizohet sa më shpejtë për të trajtuar këtë rast dhe raste të tjera të cilat tashmë i kemi referuar aty.
Kjo formë e qeverisjes me dhunë, frikë dhe shantazh është e papranueshme. Ky nivel i degradimit të qeverisjes së Prizrenit është i trishtueshëm. Totaj duhet të ndalet menjëherë dhe të reflektojë seriozisht karshi përgjegjësive të tij.