Lëvizja Vetëvendosje, dega në Dragash, ka vendosur të mos jetë pjesë e ekzekutivit lokal.
Kjo është bërë e ditur përmes një njoftimi në Facebook, ku thuhet se ata për katër vjetët e ardhshëm do të mbeten opozitë e LDK-së dhe kryetarit Bexhet Xheladini.
“Meqë dega e LDK-së në Sharr nuk e ka seriozisht ndryshimin dhe shenjë për këtë është shkelja mbi parimet e marrëveshjes, që mundësoi ndërrimin e qeverisjes në komunë, nuk ka më kuptim që si Lëvizje VETËVENDOSJE! të përfshihemi në një ekzekutiv të tillë komunal”, thuhet në njoftim.
“Jo se prisnim shumë më ndryshe, por mbështetja jonë, më shumë se sa për fitoren e LDK-së, ishte përmbushje e një obligimi ndaj më shumë se 2300 votuesve, të cilët na deleguan përgjegjësi përtej të qëndruarit neutral në periudhën e balotazhit. Ka shumë punë për ta arritur ndryshimin e vërtetë në komunën tonë. Lëvizja VETËVENDOSJE! në Sharr do të jetë në opozitë përgjatë 4 viteve të ardhshme, duke mbrojtur interesin publik e duke përcjellë me vëmendje secilin hap që do të ndjekë qeverisja aktuale”.