Ndaj deklaratës së deputetit dhe kryetarit të PDK-së, Hashim Thaçi, në fjalimin e tij në Kuvendin e Kosovës kur tha se tri partitë opozitare i janë ofruar atij për koalicion, e para që reagon ndaj kësaj deklarate është Vetëvendosje.
Përmes një reagimi dërguar medieve Lëvizja Vetëvendosje thotë se “deklarata e Hashim Thaçit në Kuvend se kinse ka pasur kërkesë nga Lëvizja Vetëvendosje është shpifja e radhës në vazhdën e mashtrimeve të këtij personazhi”.
“Në respekt të informimit të drejtë të të gjithë opinionit publik, deklarojmë se në asnjë rast a rrethanë nuk ka pasur kurrfarë përpjekje për kontakt apo takime nga ana e Lëvizjes Vetëvendosje me PDK-në apo ndonjë zyrtar të saj e as nuk do të ketë”, thuhet ndër të tjera në reagimin e VV-së, raporton Koha.net.
“E vetmja përpjekje për takim ka qenë ajo e PDK-së, kërkesë të cilën nuk kemi pranuar as ta diskutojmë dhe e kemi bërë publike me kohë për publikun. Kushdo që pretendon të kundërtën i ftojmë ta dëshmojë me fakte e publikisht”, thuhet më tej në reagim.
“Për sa na takon, jemi angazhuar dhe do të vijojmë, për ndryshim rrënjësor të realitetit në Kosovë ku personazhet e klanit Thaçi dhe ai vetë dalin para drejtësisë dhe shpaguajnë dëmet që i kanë bërë Kosovës”, përfundon reagimi i Vetëvendosjes.