Deputeti i Nismës për Kosovën, Zafir Berisha, ka thënë se nëse opozita e sheh të arsyeshme që duhet të mblidhet para datës së paralajmëruar, gjegjësisht para 27 shkurtit, atëherë do ta bëjnë një gjë të tillë.
Kjo pasi që, ditët e fundit, u publikua lajmi se Hashim Thaçi pritet të zgjidhet president i vendit këtë të enjte, ndonëse seanca akoma nuk është thirrur zyrtarisht.
“Edhe pse është paralajmëruar protesta për datën 27, nuk nënkupton se nëse e shohim të arsyshme nuk tubohemi edhe më herët. Por meqë s’ka ende mbledhje të caktuar për senacë, nuk mund të themi diçka konkretisht për veprime, po një gjë dihet: zgjedhja e Thaçit është ofendimi i radhës që i bëhet Kosovës”, ka deklaruar ai në një prononcim për Gazetën Blic.
Megjithëkë, ai ka thënë se partitë opozitare nuk e kanë synimin që të organizojnë protesta të mëdha, siç ishte ajo e 9 janarit dhe e 17 shkurtit.
“Nuk e kemi në plan që të bëjmë protesta të tipit të 9 janarit dhe 17 shkurtit, sepse masoviteti në këto protesta e ka dhënë mesazhin e vet për atë që kanë sy dhe vesh. Injorantët e kolicjonit “Zajedincë”, nuk reflekton edhe nëse krejt Kosova del në shesh”, ka shtuar tutje Berisha.
Deputeti i Kuvendit të Kosovës, më pas, ka thënë se duhet të jepet sqarim për përdorimin e forcave ndaj deputetëve të opozitës gjatë seancës së kaluar.
Ndryshe, opozita disa herë ka paralajmëruar prerë se do të vazhdojë me bllokimin e seancave dhe se nuk do ta lejojë assesi që Hashim Thaçi ta marrë postin e të parit të shtetit./GazetaBlic/