Kryeministrit serb, Ivica Daçiq dhe qeverisë së tij, u mjaftuan dy mitingje në Graçanicë, që ta nxjerrin listën serbe, të regjistruar si Iniciativa Qytetare Serbe, si një nga subjektet më të fuqishme të këtij komuniteti në komunat poshtë lumit Ibër.
Për arritjen e këtij qëllimi, Daçiq nuk ishte mërzitur shumë as për shkeljen e marrëveshjes xhentëlmene me homologun e tij Hashim Thaçi, sipas të cilës, atij dhe qeverisë serbe u ndalohej të bënin fushatë për zgjedhjet lokale në Kosovë. Madje, ishte zëvendësi i parë i kryeministrit serb, Aleksandar Vuçiq, ai i cili në ditën e fundit të fushatës, në mitingun e listës serbe në Graçanicë, pati ftuar haptas serbët e Kosovës të mbështesin subjektin që ishte sponsorizuar nga Beogradi,shkruan Tribuna.
Në deklaratat e tij, Daçiq kishte theksuar në disa raste që subjektet që përfaqësojnë serbët e Kosovës në institucione janë vegël e qeverisë së Thaçit, andaj ai synonte të instalonte një subjekt që do të jetë instrument në duart e qeverisë së tij në Beograd.
Kështu që në fund, edhe pse e formuar vetëm pak ditë para fushatës zgjedhore, Iniciativa Qytetare Serbe, e njohur si lista serbe, arriti që të shkojë në balotazh për kryetar në gjashtë komuna, duke mos llogaritur edhe katër komunat veriore, ku ajo mund të jetë favorite. Në Graçanicë, Kllokot dhe Ranillug është e para dhe me gjasa të fitojë. Kurse, në Novobërdë, Partesh dhe Shtërpcë, kandidatët e saj janë në pozitat e dyta, por nuk janë ende jashtë lojës