Një zjarr masiv ka shpërthye paraditen e sotme në një biznes privat në autostradën Tiranë-Durrës. Bëhet fjalë për një magazinë turke tapetesh.
Si pasojë e tymit të zjarrit të paktën pesë persona kanë përfunduar në spital prej asfiksisë dhe plagëve të lehta që kanë marrë në trup. Tre prej të lënduarve janë punonjës të Shërbimit Zjarrfikës, ndërsa dy të tjerë punonjës të magazinës. Të lënduarit po marrin ndihmën e nevojshme mjekësore.
Sipas të dhënave katër automjetet e zjarrfikëses kanë shkuar në objekt për të izoluar dhe më pas për të shuar flakët. Nuk dihen motivet e rënies së zjarrit.
Në vendin e ngjarjes kanë shkuar edhe forcat policore për të nisur hetimet. Nga të dhënat paraprake mësohet se dëmet materiale janë të konsiderueshme, por bilanci nuk është bërë.