Gjatë 100-ditëshit të parë të punës së udhëheqjes së re, e dalë nga zgjedhjet e fundit, në fushën e kulturës ka pasur zvarritje për disa çështje në Prizren. Neglizhenca rreth emërimit të ekzekutivit të ri komunal, që arriti të kompletohet para tri javëve është reflektuar në shtyrjen e shpalljes së tenderëve për tri ngjarje kulturore, që mbahen në verë.
Koordinatori për kulturë në kuadër të komunës, Urim Ukimeri, pranoi se pengesat kanë qenë sa i përket çështjeve procedurale, meqenëse nga drejtori për kulturë, i cili akoma nuk ishte emëruar është dashur të merret vendimi rreth tenderimit përmes ofertave me qëllim të përcaktimit të organizatorëve të festivalit “Zambaku i Prizrenit”, atij “Fluturat” dhe festivalit “Rock Live”.
“Për të qenë sa më të përgatitur në këtë punë zakonisht e kemi bërë gjatë muajit shkurt, ndërsa shkaku i mungesës së drejtorit, sivjet këtë akoma nuk e kemi bërë”, tha për “Zërin” ai.
Ukimeri tregohet optimist duke thënë se tash pas emërimit të drejtorit të ri për kulturë, çështjet e zvarritura do të procedohen pa humbur kohë për ta zënë hapin.
Përkundër mungesës së menaxherit, drejtuesit e kulturës në Prizren, thanë se ata kanë arritur që gjatë janarit dhe shkurtit t’i organizojnë dy aktivitete të rëndësishme. Në këtë kontekst ata përmendën organizimin e aktivitetit për shpalljen e prizrenasve më të dalluar në fushën e kulturës e sportit për vitin e kaluar, si dhe aktiviteteve tre ditore në kuadër të shënimit të përvjetorit të gjashtë të shpalljes së pavarësisë së vendit, me 17 Shkurt.