Kandidati i koalicionit AAK-LDD, për kryetar të Prizrenit, Lulëzim Kabashi është takuar me strukturat të partisë në fshatin Velezhë dhe Shpenadijë, si dhe me banorët e disa fshatrave të Hasit. Kabashi në këto dy vende është shoqëruar edhe nga kryetari i Degës së AAK-së në Prizren,Fatmir Kastrati.
Kandidati Kabashi në këtë takim ka prezantuar programin e tij qeverisës. Ai u premtoi banorëve të këtyre fshatrave se të gjitha kërkesat e tyre do të përfshihen në programin e tij.Kabashi po ashtu premtoi se nëse do t’I fitojë zgjedhjet, do të luftojë korrupsionin që është instaluar në Komunën e Prizrenit.
Kabashi, me bashkëpunëtorët e tij, një takim të tillë e ka mbajtur edhe me qytetarë të fshatit Lubizhdë e Hasit, Dedaj, dhe Bregu i Drinit.
Kabashi, gjatë këtyre takimeve premtoi se rregullimi i infrastrukturës rrugore në përgjithësi, rrjetit të kanalizimit, ujit të pijes, sistemit të ujijtjes por edhe ndërtimi i urës, investimet në sektorin e shëndetësisë, si dhe mirëmbajtja dhe investimi në shtratin e Drinit të Bardhë, do të rregullohen brenda mandatit të ardhshëm katër vjeçar.” Këto janë kërkesa elementare, që deri më tash është dashur të jenë të zgjidhura”, tha Kabashi.
Ai premtoi se në programin e tij qeverisës, rëndësi e veçantë do t’i kushtohet zhvillimit ekonomik, i cili do të realizohet përmes katër shtyllave kryesore: funksionalizimit të zonave industriale, investimeve në sektorin e bujqësisë, rregullimit të çështjes së ndihmave sociale, ku parashihet punësimi i të paktën një personi për secilën familje në komunën e Prizrenit, dhe si shtyllë tjetër të rëndësishme për zhvillimin ekonomik përmendi edhe ndërtimtarinë./PrizrenPress.com/