Një zyrtar i një partie politike në Komunën e Malishevës është arrestuar mbrëmë vonë pas mesnate, pasi që i njejti gjatë numërimit të votave në depon komunale ka tentuar manipulimin e tyre. Këtë e ka bërë të ditur Policia rajonale e Prizrenit.

Sipas Policisë, rreth orës 02:30 minuta, një zyrtar i një partie politike ka informuar Policinë në Malishevë se gjatë numërimit të votave në depon komunale janë vërejtur parregullsi gjatë numërimit.

“Pas pranimit të informacionit, hetues policor kanë arrestuar një komisionar të një subjekti politik. Pritet të sqarohen rrethanat e rastit. Me vendim të prokurorit, i dyshuari ndalet nën masën e arrestit për 48 orë me dyshimin e bazuar se i njëjti ka kryer veprën penale të shpërdorimit të detyrës”, thuhet në njoftimin e Policisë rajonale të Prizrenit.

Anëtari i Kryesisë së Lidhjes Demokratike të Kosovës (LDK), Eqrem Kryeziu, ka thënë se ndonëse nuk mund të dal në këtë moment me ndonjë vlerësim detal rreth shkaqeve që kanë quar në arritjen e rezultatit “humbës” të LDK-së në këto zgjedhje, mund të thotë se ndër arsyet kryesore ka qenë mungesa e mjeteve financiare.

Eqrem Kryeziu, gjithashtu ka vlerësuar se edhe fushata agresive e kundërshtarëve politikë nëpër komuna që udhëheq LDK-ja, është faktor tjetër se pse partia e tij nuk ka arritur të dal partia e parë në zgjedhjet e 8 qershorit.

Megjithatë, në një prononcim për Telegrafin, ai ka thënë se po e pret deklarimin e Kryesisë së partisë, për rezultatin e LDK-së në zgjedhjet e së dielës.

“Nuk dua të flas pa dalë ata me një deklaratë. Ndërsa edhe për arsyet e këtij rezultati duhet me i pyet kryesinë e partisë”, ka thënë Kryeziu./telegrafi/

Ish-presidenti i Kosovës, Fatmir Sejdiu, i cili është edhe kryetar nderi i LDK-së, ka thënë se zgjedhjet parlamentare të 8 qershorit treguan kulturën demokratike të qytetarëve të Kosovës.

Në një deklaratë për media, duke mos e komentuar humbjen e LDK-së, ka thënë se është momenti për ta vlerësuar përkushtimin qytetar të votuesve dhe po kështu, sipas tij, edhe përgjegjshmërinë e partive politike për mbarëvajtjen e deritashme të procesit zgjedhor.

“Procesi zgjedhor dhe vota e elektoratit përcakton vendin dhe forcën e partive politike dhe ky përcaktim politik kërkohet të respektohet, duke kontribuar të gjitha subjektet elektorale në vazhdimin e proceseve tjera të konsolidimit të institucioneve legjislative dhe ekzekutive. Shpresojmë në vazhdimin e këtij procesi demokratik dhe në përmbylljen e tij të suksesshme, me ç’rast fituesit më të mëdhenj do të jenë qytetarët dhe perspektiva evropiane e qytetarëve dhe e shtetit të Kosovës”, ka thënë Sejdiu.

Kryetari i Prishtinës, e numri dy i Vetëvendosjes, Shpend Ahmeti, ka rikujtuar partitë opozitare që në qoftë se nuk bëjnë koalicion me PDK-në, atëhër partia e Hashim Thaçit s”do të mund ta krijojë qeverinë.

“Në qoftë se të gjitha subjektet opozitare i rrinë besnik zotimeve se nuk hyn në koalicion me PDK, ata nuk do të mund ta formojnë qeverinë. Për njërin subjekt mund të garantoj”, ka shkruar Ahmeti në Facebook. /PrizrenPress.com/

Blerand Stavileci nga Partia Demokratike e Kosovës pas fitores që shpalli partia e tij, nuk ka lënë pa ironizuar me kryetarin e Lidhjes Demokratike të Kosovës, Isa Mustafa

Stavileci, i cili edhe është Ministër i Bujqësiesë, nëpërmjet një postimi në facebook ka thënë se Mustafa u pa që me slogane sheh larg.

“U pa që edhe me sllogane ankademiku sheh larg. Sot Komunën, nesër Kosovën thojke.Te dyjat i fitoi. Veç ai me ata (Bardhylin, Avdullahun & Co) munden. Dekorohen me çmimin Nobel për dështim dhe pensionim, çmimin Dzurinda”, ka shkruar Stavileci në Facebook. /PrizrenPress.com/

Pjesëmarrja e serbëve në zgjedhjet e parakohshme parlamentare të Kosovës, është e kënaqshme dhe tregon unitetin e tyre, vlerësojnë politikanët serb të Kosovës dhe zyrtarë të qeverisë serbe.

Kryetari i Listës Serbe, Aleksandar Jabllanoviq, duke folur për Radion Evropa e Lirë, vlerëson se zgjedhjet kanë kaluar të qeta dhe sipas të dhënave të këtij subjekti, kanë votuar rreth 53 mijë serbë në gjithë Kosovës, prej të cilëve 15 mijë e 327 nga katër komunat e veriut të vendit.

Ai pret që serbët do të marrin më shumë se 10 ulëse në Kuvendin e Kosovës, të cilat i kanë të garantuara.

“Vlerësoj se zgjedhjet kanë kaluar të qeta dhe në masë të madhe të rregullta, duke pasur parasysh që OSBE-ja në veri të Kosovës nuk e ka sjellë materialin zgjedhor në sasinë e plotë. Nuk ka pasur incidente. Në qoftë se në Kuvendin e Kosovës ndahen mandatet sipas Ligjit për zgjedhjet e përgjithshme, për çka ne edhe do të insistojmë, gjithsesi që presim numër më të madh të mandateve se sa ai që është i garantuar me këtë ligj. Do të thotë, në çdo rast, do të jenë më shumë se 10 mandate. Por, se sa do të jetë ky numër, do të dihet pas shpalljes së rezultateve zyrtare”, thotë Jabllanoviq.

Marko Gjuriq, drejtor i Zyrës së Qeverisë së Serbisë për Kosovën, i uron serbët e Kosovës për pjesëmarrje në zgjedhje, duke i lavdëruar për, siç thotë, “nivel të lartë të përgjegjësisë”.

“I uroj të gjithë ata, të cilët, pavarësisht kushteve gati se të pamundura, patën sukses që të luftojnë për atë që sot mund të themi se në Kosovë kemi situatë më të qartë dhe më të mirë sa i përket të ardhmes së procesit të përgjithshëm politik”, thekson Gjuriq.

Ndryshe, Jabllanoviq konsideron se tash e tutje, serbët nuk do të marrin asnjë vendim pa bashkëpunuar me Qeverinë e Serbisë. “Kemi treguar një unitet të vlefshëm për t’u respektuar. Në të ardhmen do të tregojmë se pa një bashkëpunim të serbëve të Kosovës dhe Qeverisë së Serbisë, bashkësia serbe nuk do ta ndërmarrë asnjë veprim të pavarur pa qeverinë serbe”, shprehet Jabllabnoviq.

Ndërkaq, Gjuriq vlerëson se me pjesëmarrjen në zgjedhjet parlamentare të Kosovës, serbët kanë treguar se qëndrojnë me shtetin e Serbisë.

“Ky është tregues i rëndësishëm se kemi ardhur në fazën kur me veprim të përbashkët, disiplinë, organizim dhe përkushtim, ne mund të luftojmë për realizimin e qëllimeve tona. Mbase edhe në mënyrën që dikur e kanë bërë kundërshtarët tanë në krejt këtë proces, në të cilin gjendemi sot”, thotë Gjuriq.

Ndryshe, serbët e katër komunave të veriut të Kosovës, për herë të parë kanë marrë pjesë në zgjedhje parlamentare të Kosovës.

Përderisa lideri i Lidhjes Demokratike të Kosovës, Isa Mustafa nuk ka dalë ende me një deklaratë zyrtare sa i përket rezultatit preliminar të zgjedhjeve, kandidati për deputet i kësaj partie, Bardhyl Meta e ka uruar liderin e Partisë Demokratikë të Kosovës, Hashim Thaçi për fitoren në zgjedhjet parlamentare.

“Dëshiroj që të uroj kryetarin e Partisë Demokratike të Kosovës, Hashim Thaçi, si dhe partneret e tjerë të koalicionit rreth PDK-së për fitoren e tyre të pastër dhe të pa kontestueshme në zgjedhjet që ishin të organizuara shumë mirë, të cilat ishin demokratike dhe rregullta”, ka shkruar Meta në rrjetin social Facebook.
Ai po ashtu ka uruar edhe qytetarët e Kosovës për kulturën demokratike dhe qytetëruese gjatë fushatës si dhe gjatë procesit të votimit.