Siç ka paralajmëruar mbrëmë gazeta Express Partia Demokratike e Kosovës, ka publikuar sondazhin, ku ajo del fituese ndaj partive të tjera politike. Sipas sondazhit, PDK del e para, LDK e dyta derisa partia e tretë është Vetëvendosja.

Derisa afrohet 8 qershori, dita kur do të përcaktohet skena e re politike në vend, një sondazh tjetër i besueshëm ndërkombëtar që ka arritur ta shohë gazeta Tribuna e vë sërish si lidere Partinë Demokratike të Kosovës (PDK). Sondazhi i realizuar në fund të muajit maj e pozicionin PDK-në me 31.2%, apo 5.7% më shumë se partia e dytë e që është Lidhja Demokratike e Kosovës (LDK). Partia e Isa Mustafës, sipas këtij sondazhi, në zgjedhjet e 8 qershorit pritet të ketë 25.5% të votës së përgjithshme.

Në vendin e tretë renditet Lëvizja Vetëvendosje (LVV) me 14.3%, derisa Aleanca Kosova e Re (AKR) pozicionohet si forca e katërt në vend më 9%. Pas partisë së Behgjet Pacollit vjen Aleanca për Ardhmërinë e Kosovës (AAK) me 8%. Iniciativa Qytetare e themeluar nga ish-zyrtarët e lartë të PDK-së, Fatmir Limaj dhe Jakup Krasniqi, sipas këtij sondazhi, nuk do të mund ta kalojë pragun zgjedhor prej 5%. Nisma pritet të ketë jo më shumë se 2.5%.

Sipas këtij sondazhi, 4.9% do të marrin të tjerët, derisa 4.6% e respodentëve kanë thënë se mbesin të papërcaktuar deri në ditën e votimit, derisa është vërejtur një përqindje e madhe e respondentëve që ndonëse në përgjigjen e parë kanë dhënë preferencën e tyre, kur janë pyetur nëse do të donin një ofertë edhe më të mirë politike, kanë reaguar pozitivisht./Tribuna/

Institucioni më i lartë i kontrollit mbi pushtetin legjislativ dhe ekzekutiv, Gjykata Kushtetuese e Kosovës (GJKK) ka shkelur rregullat financiare të thesarit me rastin e shpërblimit të anëtarëve të saj në dy komisione të brendshme. Raporti i Auditorit të Përgjithshëm vë në pah se ky institucion ka shpërblyer kundërligjshëm anëtarët e saj për punën që kanë bërë.

“GJKK, kishte ekzekutuar pagesa për grupet e brendshme punuese për aktivitete të kryera gjatë orarit të rregullt të punës. Njëri grup punues ishte themeluar për monitorimin e ekzekutimit të vendimeve të GJKK-së, ndërsa tjetri për bashkëpunim ndërkombëtar të GJKK-së. Të dyja grupet punuese i kishin nga pesë anëtar. Pagesa për këto grupe punuese për periudhën dy mujore ishte në vlerë 3,200 euro”, thuhet në raportin e auditorit.

Sipas rregullës financiare nr. 01/2013/MF për shpenzimin e parave publike, pagesat për komisionet e brendshme për punë e bërë gjatë orarit të rregullt të punës nuk janë të lejueshme. Lidhur me këtë çështje, auditori vlerëson këtë si rrezik ngase shpenzimet e shkaktuara, të cilat nuk janë në pajtueshmëri me rregullat e financiare të thesarit mund të kenë efekte financiare për buxhetin e GJKK-së. Kjo mund të shkaktojë kosto shtesë për buxhetin e tyre./tribuna/

Kryetari i Partisë Demokratike të Kosovës (PDK), Hashim Thaçi, në një intervistë për të përditshmen prestigjioze austriake “Die Presse”, ka thënë se në zgjedhjet e së dielës PDK-ja do të dalë fituese bindëse. “Programi ynë po pranohet.

Qytetarët ju besojnë premtimeve të mia që në mandatin e ri do t’i krijojmë 200 mijë vende të reja të punës”, ka thënë Thaçi për gazetën austriake. Ai ka shtuar se në mandatin e ardhshëm do të ketë një mazhorancë shumë të fuqishme në Kuvendin e Kosovës.

Duke u përgjigjur në pyetjen për slloganin e ri të PDK-së, Thaçi ka thënë se misioni i parë ka qenë liria dhe shteti i Kosovës. Misioni i dytë, sipas tij, ka qenë forcimi i shtetësisë së Kosovës, të cilën e kemi përfunduar me sukses.

“Prandaj, tani qytetarët do të ma besojnë misionin e ri: zhvillimin ekonomik dhe krijimin e vendeve të punës. Para pak ditësh kemi marrë vendimin për ngritjen e pagave për 25 për qind për të gjitha kategoritë, në përputhje me kriteret e Fondit Monetar Ndërkombëtar”, ka thënë kreu i PDK-së, duke shtuar se këtë muaj do të fillojë ndërtimi i autostradës Prishtinë – Shkup, transmeton “KosovaPress”.

“Ne po e ndryshojmë Kosovën”, ka theksuar Thaçi. Ai ka folur edhe për procesin e liberalizimit të vizave dhe për dialogun me Serbinë.

Prizreni, qyteti më i bukur dhe më i pastër i Kosovës, dje pas tubimit të Partisë Demokratike të Kosovës në këtë qytet është parë më i ndotur se kurrë.

Kjo pasi që pas tubimit nuk është përkujdesur askush që ta pastroj Shadërvanin dhe qytetarët e pa kujdesshëm e kishin mbuluar të gjithë me letra.

Këto fota janë dërguar në imellin zyrtar të redaksisë së PrizrenPressit nga një lexues.

Kandidati për deputet i Lëvizjes Vetëvendosje, Rexhep Selimi, ka thënë se janë në garë të ngushtë me dy subjektet kryesore politike, PDK’në e LDK’në.

Ndonëse ka pranuar se kjo garë do të jetë tejet e ngushtë, Selimi është shprehur i bindur se Lëvizja Vetëvendosje, do të triumfojë me 8 qershor.

Ai në një intervistë për gazetën Epoka e Re ka thënë se pavarësisht garës që është e fortë, Vetëvendosja do të jetë fituese.

“Është shumë me rëndësi për Kosovën që zgjedhjet të jenë të lira dhe demokratike, sepse manipulimet e llojit të vitit 2010 do të ishin hap prapa demokracisë dhe një gjë shumë e keqe për Kosovën dhe rrugën e saj drejt integrimit në Bashkimin Evropian”, ka thënë për “Koha Ditore” Ian Cliff.

Sa i përket mundësisë së bojkotimit të zgjedhjeve nga ana e serbëve, ambasadori britanik ka potencuar se kjo do të ishte gjë shumë e keqe nga ana e tyre.

Dialogu me Serbinë, sundimi i rendit dhe ligjit, zhvillimi ekonomik dhe integrimi evropian, janë tri çështjet kryesore me të cilat duhet të merret qeveria e ardhshme. Cliff ka thënë se njerëzit duhet të punësohen për shkak se janë profesionistë e jo sepse kanë paguar para apo kanë lidhje me përfaqësuesit e partive politike.

Ambasadori i Britanisë së Madhe ka folur edhe për qeverisjen e Shpend Ahmetit në Prishtinë, rastin “QKUK” si dhe procesin e integrimit të Kosovës në BE

Punëtori teknik i shkollës fillore në Zatriq, vendlindja e kryetarit të komunës së Rahovecit Idriz Vehapi, nuk ka lejuar që Aleanca për Ardhmërinë e Kosovës të mbajë tubimin e planifikuar zgjedhor. Edhe përkundër sqarimeve të dhëna punëtori teknik I.V. nuk ka pranuar të hapë dyert e shkollës për AAK-në.

Policia në Rahovec ka reaguar menjëherë dhe e ka vënë në mbajtje punëtorin në fjalë, ndërsa Smajl Latifi, kryetar i degës së AAK-së ka kërkuar që kjo çështje të mos marrë përmasa, pasi që fushata zgjedhore deri më tani ka qenë pozitive dhe nuk dëshirojmë që nga një rast i izoluar të prishet imazhi i fushatës.

Merret vesh se policia e ka intervistuar punëtorin teknik dhe më pas e ka liruar në procedurë të rregullt.

Tubimi është mbajtur në një shtëpi private, ku kandidatët për deputetë Smajl Latifi, Florije Popaj-Boshnjaku dhe Dr. Agim Hazrolli, u zotuan se ata do të bëjnë dallime vetëm ndërmjet të mirës dhe të keqes, ngecjes dhe zhvillimit, kujdesit shëndetësor ndaj qytetarëve dhe neglizhencës e degradimit, zhvillimit dhe mashtrimit.

Pas këtij incidenti fushata e AAK-së ka vazhduar në disa fshatra të tjera të komunës së Rahovecit, ku kanë marrë pjesë numër i konsiderueshëm qytetarësh./Rahovecpress/