“Ec Ma Ndryshe” sot ka publikuar analizën “Planifikim urban për qytetarët”, që është produkt i anketimit me qytetarë të Prizrenit me mostër të gjerë dhe i shpalos rezultatet mbi problemet dhe sugjerimet e tyre për planifikimin urban. Ndër problemet më të mëdha të qytetarëve ishin bllokimi i trotuareve me makina, mungesa e mirëmbajtjes së trotuareve gjatë dimrit, ndërtimet pa leje, mungesa e hapësirave të gjelbëruara, qarkullimi i vështirësuar për persona me aftësi të kufizuar, problemet me ujësjellës dhe ndërtimet e larta.

“Problemi më akut nga përgjigjet e të gjitha grupeve të interesit ndërlidhet me të qenit këmbësor dhe me lëvizjen e lirë në qytet. Pengesa në lëvizje nëpër trotoare nga makinat e parkuara dhe në kushte të vështira atmosferike, nga bora e papastruar. Në grupin e problemeve të lëvizjes nëpër qytet hyjnë edhe problemet e mungesës së infrastrukturës së nevojshme për njerëzit me aftësi të kufizuara; problemet e sigurisë në rrugë, e cila edhe pse e pa specifikuar në pyetësor, mund të jetë siguria e lëvizjes e cënuar nga automjetet; siguria nga krimi; siguria e lëvizjes së femrës pa ngacmime e provokime të natyrës seksuale, etj.

Të gjitha këto probleme konfirmojnë se planifikimi dhe manaxhimi urban në komunën e Prizrenit është ndër sektorët më të pazhvilluar. Për më tepër, anketimi me qytetarë konfirmon edhe mungesën e madhe të konsultimit dhe përfshirjes së tyre në procesin e hartimit të planeve urbane të komunës. Komuna duhet të insistojë në ndërmarrjen e fushatave vetëdijesuese dhe informuese përmes shpërndarjes së materialeve dhe organizimit të takimeve informuese me fokus grupe në nivel të njësive më të vogla administrative (psh. këshillat e lagjeve, këshillat e banesave, etj.)”, thuhet në raport.

Sipas hulumtimit del se femrat janë më pak të informuarat në lidhje me planet urbane dhe çështjet që ndërlidhen me qytetin në përgjithësi. Shqetësimi kryesor te planifikimi gjithpërfshirës urban është e drejta e shfrytëzimit të barabartë të qytetit nga femra, pa pengesa, vështirësi dhe frikë. Sipas “Ec Ma Ndryshe”, komuna duhet të fuqizojë rolin e femrës në proceset që ndërlidhen me planifikimin urban dhe të adresojë të gjitha aspektet që ndërlidhen me shfrytëzimin e papenguar të qytetit.

“Nga mostra e hulumtumit gjithashtu del se pjesëtarët e bashkësisë boshnjake, rome, ashkali, egjiptiane dhe turke janë në disavantazh ndaj shumicës shqiptare në këtë aspekt. Shkalla e mosinformimit te këto bashkësi është jashtëzakonisht e lartë dhe mjaft shqetësuese. Nga këto të dhëna del se komuna duhet të angazhohet më shumë në sektorin e informimit në gjuhët e këtyre bashkësive, t’i takojë në fokus grupe të përziera dhe të veçanta si dhe duhet të punojë më shumë në integrimin e tyre dhe adresimin e shqetësimeve dhe çështjeve të interesit të tyre në lidhje me qytetin”, thuhet në raport.

Shqetësimi tjetër që dominon ndër qytetarë të Prizrenit, bazuar në këtë hulumtim, është hapësira dhe objektet publike. Grupi i interesit të pensionistëve prej problemeve kyçe në qytet, cilëson mungesën e vendtakimit të tyre si dhe mungesën e parqeve. Ndërsa të rinjtë në vend të parë kanë mungesën e hapësirave dhe objekteve për aktivitete kulturore. Komuna e Prizrenit, krahas promovimit të lëvizjes në qytet në këmbë dhe me biçikletë, dhe zgjerimit të rrjetit të rrugëve dhe shtigjeve këmbësorike, do të duhej të kujdesej për krijimin e pikëtakimeve, hapësirave publike të madhësive të ndryshme, parqeve e zonave të gjelbëruara dhe hapësirave për kulturë e rekreacion./PrizrenPress.com/

Nënkryetari i LDK-së, Avdullah Hoti, ka akuzuar autoritete e Malishevës për largim nga puna të mësimdhënësve nga procesi mësimor për bindje politike.

“Largimi i mësimdhënësve në Malishevë që kanë bindje tjera politike manifeston qeverisjen joligjore dhe klanore të PDK-së”, shkruan Hoti në profilin e tij Facebook. Sipas tij, plot raste kanë shkuar në Prishtinë për të kërkuar mbështetje ndaj spastrimit që PDK-ja u ka bërë shkollave nga arsimtarët që janë votues të LDK-së, të cilët me krenari kanë shfaqur mbështetjen ndaj LDK-së, filozofisë rugoviane dhe lidershipit të Kryetarit Mustafa.

“Largimi i arsimtarëve mbi baza politike, i kamufluar me arsyetimit se nuk janë banorë të Malishevës, është joligjor dhe duhet stopuar nga organet përgjegjëse. Fatkeqësia është se këto organe përgjegjëse janë vetë pjesë e praktikave të tilla joligjore. Paramendoni se çfarë do të ndodhte sikur në Prishtinë të ndodhte një gjë e tillë. Do të kishim qindra arsimtarë që do të largoheshin nga puna pasi nuk janë banorë të Prishtinës, mijëra nxënës do të largoheshin nga shkollat dhe shumë të tjerë nuk do ju ofroheshin shërbimet komunale. Kosova është një dhe e pandarë. Në Kosovë nuk ka asnjë bazë ligjore që njerëzit të diskriminohen pse nuk janë banorë të regjistruar në komunën përkatëse”, shkruan Hoti . Ai shprehet i binduar se ky veprim joligjor do të marrë ndëshkimin nga vota e qytetarëve në zgjedhjet e 3 nëntorit./PrizrenPress.com/

“Iniciativa qytetare Serbia”, është subjekti të cilin Beogradi e ka prezantuar për regjistrim dhe certifikim te Komisioni Qendror i Zgjedhjeve, si listë unike që do t’i përfaqësojë serbët e Kosovës në zgjedhjet lokale të 3 nëntorit. Kjo listë është dorëzuar për certifikim në KQZ nga Vlladeta Kostiq, i cili mban postin e të ashtuquajturit kryesues i qarkut për Kosovën.

Mirëpo, emri i kësaj liste është kundërshtuar menjëherë nga disa anëtarë të Komisionit Qendror të Zgjedhjeve, ngase është vlerësuar se nuk përkon me Kushtetutën dhe ligjet e Kosovës. Ndërkaq, Kostiq, në anën tjetër, u ka thënë medieve serbe se lista unike, e cila mban emrin e Serbisë, nuk do të duhej të kuptohej si cenim dhe ofendim për askënd,shkruan Tribuna

Ai ka thënë se njeh edhe shqiptarë që kanë emrin “Alban” dhe nuk ndihet i fyer me këtë fakt, kështu që ka pretenduar se KQZ nuk do ta shohë si problem certifikimin e kësaj liste me emrin “Serbija”