Partia Konservatore e Kosovës konsideron se fushata elektorale për zgjedhjet komunale ka rrjedhur në një atmosferë të qetë, në frymën demokratike dhe pa probleme serioze. Sipas PK-së, vërejtjet kryesore kanë të bëjnë me largimin, mbulimin dhe shqyerjen e disa materialeve propaganduese të postuara nëpër vende të ndryshme nëpër qytet.

Kandidati i Partisë Konservatore të Kosovës për kryetar të Prizrenit, Beni Kizolli, duke vlerësuar zgjedhjet lokale si historike për qytetin e Prizrenit, ka apeluar te qytetarët e Komunës që të dalin në këto zgjedhje në mënyrë masive.

“Në emër timin personal dhe të Partisë Konservatore të Kosovës, të anëtarësisë, simpatizantëve dhe qytetarëve të Komunës së Prizrenit, për mbështetjen dhe përkrahjen e vazhdueshme si dhe për konsideratën e mediave lokale ndaj aktiviteteve të Partisë në kuadër të fushatës parazgjedhore, ju drejtohem të gjithë qytetarëve të komunës së Prizrenit që të dalin në këto zgjedhje në mënyrë masive, duke vlerësuar si zgjedhje historike për qytetin tonë. Ju thërras të gjithëve dhe secilin votues që të ktheni buzëqeshjen dhe shpresën tuaj të humbur, sepse ju keni merituar më shumë nga qeveria komunale. Keni merituar që të keni një jetë të lumtur me dinjitet dhe që të trajtoheni ndryshe nga qeveritë e mëparshme lokale. Prandaj, adresa juaj e vetme është Partia Konservatore e Kosovës, është numri 63 dhe janë kandidatët nga Partia Konservatore e Kosovës dhe votoni për më të mirët”, tha Kizolli.

Ndërsa, kandidati për kuvendin komunal të Prizrenit, Nderim Pasuli, tha se fushata e Partisë Konservatore të Kosovës ishte e dinjitetshme dhe e kuptimplotë.

“Fushata jonë ishte e dinjitetshme dhe e kuptimplotë. Kemi dëshmuar se si bëhet një fushatë moderne dhe demokratike. Kemi dëshmuar se si edhe me një buxhet të vogël e të pamjaftueshëm mund të arrihet maksimumi dhe rezultati i suksesshëm duke fokusuar energjinë dhe aktivitetet tona në çështjet kryesore në bazë të planifikimit strategjik. Prandaj, kjo dëshmon se Partia Konservatore e Kosovës është ndryshe, jemi sjellë ndryshe dhe me mbështetjen e qytetarëve do të sjellim ndryshime në skenën politike të Prizrenit”, tha Pasuli./PrizrenPress.com/

Ministri i Punëve të Jashtme të Gjermanisë, Guido WesterWelle, e ka përshëndetur mbajtjen e zgjedhjeve që për herë të parë mbahen në tërë territorin e Kosovës.

Në një deklaratë për shtyp ai u ka bërë thirrje të gjithë qytetareve të Kosovës që të marrin pjesë në këto zgjedhje.

“Të gjithë personat me përgjegjësi politike do të duhet të angazhohen për një proces zgjedhor të lirë dhe të ndershëm. Zgjedhjet janë një kriter matës i rëndësishëm për zhvillimin demokratik të Kosovës”, thuhet në deklaratën e Westerwelles.

Kandidati për kryetar të Komunës së Malishevës nga radhët e LDK-së, Sali Morina është takuar me studentë në Prishtinë.

Të pranishmit i përshëndeti me një fjalë rasti kryetari i Degës Januz Kastrati i cili tha se “si profesor që kam qenë, Salih Morina është dalluar në mësime, pastaj si bashkëpunëtor është dalluar në politikë, dhe kam bindjen e plotë se do të dallohet për të mirë edhe në udhëheqjen e komunës së Malishevës mbas 3 nëntorit”

Deputetja e Kuvendit të Kosovës Hikmete Bajrami theksoi se LDK-ja në këto zgjedhje ka njerëzit më të mirë për kandidat për kryetar komune.

Kandidati për kryetar komune Salih Morina shprehu kënaqësinë e tij që gjendej para studentëve të Malishevës të shpalosë programin qeverisës të LDK-së e në veçanti programin për të rinjtë./PrizrenPress.com/

Kandidati i koalicionit AAK-LDD për kryetar të Prizrenit, Lulzim Kabashi, ka zhvilluar një takim me banorët e fshatit Qëndresë. Ai ka kërkuar nga banorët e këtij fshati që me 3 nëntor të votojnë kundër keqqeverisjes.

“Është momenti i duhur që të dënohet keqqeverisja e deritashme, dhe të bëhen ndryshime në Prizren. Këto ndryshime do të ndodhin pas fitores së koalicionit”.

Kabashi tha se  platforma e tij qeverisëse,  përveç zhvillimit ekonomik, i cili do të realizohet përmes funksionalizimit të zonave industriale, investimeve në bujqësi dhe nënsektorët tjerë të bujqësisë, investimeve në turizëm dhe ndërtimtari, do të realizohen edhe shumë projekte të tjera në të mirë të qytetarëve të komunës së Prizrenit. “Prizreni po kërkon ndryshime”. Ai premtoi se edhe në këtë fshat do të rregullohet komplet infrastruktura rrugor.

Kryetari i Degës së AAK-së në Prizren Fatmir Kastrati, gjatë takimit që u mbajt me banorët e fshatit Qëndresë, kërkoi nga ata, që me 3 nëntor të dalin në votime dhe të votojnë Aleancën për Prizrenin”

“Nuk ka kandidatë të tjetë më të mirë se  Kabashi për të menaxhuar qytetin e Prizrenit dhe për të kthyer qeverisjen e Prizrenit në binarë të duhur, duke sjellur mirëqeverisje dhe zhvillim ekonomik të vendit”.

Edhe kandidati i koalicionit AAK-LDD, për Asamblenë Komunale, Sylejman Osmani,  i cili vie nga ky fshat, kërkoi  nga bashkëvendësit që të votojnë Kabashin për kryetar të Prizrenit. /PrizrenPress.com/