Në funksion të uljes së papunësisë dhe ngritjes së kapaciteteve turistike, zyrtarja e Zyrës Informative Turistike në Rahovec Saranda Shala, ishte në Bruksel ku mori pjesë në seminarin me titull “Politikat e punësimit: lufta kundër papunësisë së rinisë”.

Seminari u organizua nga komiteti i regjioneve për asistencë teknike dhe shkëmbim të informacioneve për Komisionin Evropian.

Gjatë tri ditëve të seminarit pjesëmarrësit nga vendet e Ballkanit perëndimor kanë pasur mundësi të përfitojnë njohuri të reja dhe praktikat më të mira rreth përfshirjes së një numri sa më të madh të rinjsh në projekte të ndryshme.

Zyrtarja Saranda Shala ka përfaqësuar Kosovën në këtë seminar dhe ka prezantuar shkallën e papunësisë në Kosovë (në bazë të të dhënave zyrtare), si dhe perspektivën e Kosovës si shtet i ri.

Në seminar ka pasur komunikime të shumta dhe interaktivitet me përfaqësuesit e vendeve të tjera të Ballkanit. Shala ka bërë një prezantim edhe të gjendjes aktuale në komunën e Rahovecit, sidomos në sferën e turizmit të verërave dhe përpjekjeve që po bëhen që Rahoveci të jetë zonë atraktive e turizmit rural.
Shala ka folur edhe për parandalimin e punëve të rrezikshme për fëmijët, si dhe përfshirjen e tyre në sistemin arsimor profesional. Aranzhimin e këtij takimi e ka bërë TAIEX i Komisionit Evropian, gjegjësisht përfaqësuesja Kataryna Zakhareviç nga Polonia./PrizrenPress.com/

Partia Konservatore e Kosovës, në kuadër të fushatës elektorale dhe planit veprues për zgjedhjet komunale është takuar me qytetarët e lagjes “Ortakoll”.
Në një atmosferë festuese para një numri të madh qytetarësh,Munir Basha, kryetari i Partisë Konservatore të Kosovës, tha se ky subjekt politik është në fazën finale të fushatës elektorale.

“Tani qytetarët janë të bindur për vlerat tona, për programin dhe ofertën tonë dhe janë të sigurt se për kë do të votojnë. Ata do të votojnë për Beni Kizollin, për numrin 63 dhe për kandidatët tonë për asamblenë komunale të Prizrenit, sepse ne jemi ndryshe dhe se Prizreni gjatë 14 viteve të fundit është udhëhequr nga njerëz të cilët nuk kanë ditur të menaxhojnë Prizrenin në mënyrë të drejtë dhe të suksesshme”, tha Basha.

Me duartrokitje të gjata është pritur edhe Beni Kizolli, kandidati i Partisë Konservatore të Kosovës për kryetar të Prizrenit.

“Mungesa e furnizimit të rregullt me ujë të pijshëm, grumbullimi dhe dislokimi i pakënaqshëm i mbeturinave, ndriçimi i pamjaftueshëm i hapësirave publike, parkimi kaotik i veturave nëpër trotuare si dhe mosmirëmbajtja e duhur e oazave të gjelbëruara dhe të parqeve janë disa nga shqetësimet tuaja dhe të Partisë Konservatore e Kosovës”

“Synimi ynë është që qytetari me ndihmën dhe përkushtimin e Partisë Konservatore të Kosovës të mos ketë më nevojë që të merret me këto probleme të shërbimeve publike të cilat janë të garantuara me ligj por gjithë së bashku të merremi me gjërat tjera që mundësojnë prosperitetin familjar, zhvillimin kulturor, shoqëror dhe ekonomik të Prizrenit. Partia Konservatore ka një plan konkret në këtë drejtim e ai është themelimi i këshillave nëpër lagje të cilët do të merren me kërkesat e banorëve dhe do t`i shqyrtojnë pranë drejtorisë përkatëse për tu marrë më tutje me kërkesat e parashtruara. Ne nuk premtojmë qindra miliona investime sepse ato janë të garantuara me buxhetin komunal, por premtojmë identifikimin, shqyrtimin dhe zgjidhjen e problemeve konkrete të qytetarëve”, tha Kizolli.

Në fund janë prezantuar edhe kandidatët e Partisë Konservatore të Kosovës nga kjo lagje si: Aida Buza Hapçiu, Ilir Shijaku dhe Shend Kabashi. /PrizrenPress.com/

Kandidati i PDK-së për kryetar të Prizrenit, Ramadan Muja, në kuadër të fushatës zgjedhore, ka vizituar Teqenë e Tarikatit Rufai në Prizren dhe Sheh Adrinë.
Muja bashkë me kandidatët për Asamblenë Komunale, është njohur me historinë dhe ambientin e Teqes. Muja gjatë kësaj vizite ka folur për programin e PDK-së dhe rininë prizrenase.

Ai premtoi se gjatë mandatit të ardhshëm rinia e Prizrenit, do të ndihen edhe më krenar për qytetin e Lidhjes.

“Përveç kushteve për shkollim në Universitetin Publik të Prizrenit do të hapen edhe mundësi të punësimit, nga se do të nisë së funksionuar parku i biznesit dhe jemi të gatshëm që t’i ndihmojmë të gjithë investitorët që duan të kontribuojnë për Prizrenin Europian, numri i të interesuarave që nuk është i vogël.Në fund Sheh Adria, i ka uruar Mujës suksese, dhe që ta vazhdojë bashkëqeverisjen me qytetarët edhe në mandatin e ardhshëm./PrizrenPress.com/

Kandidati i PDK-së për kryetar të Komunës së Prizrenit, Ramadan Muja, ka vizituar Shoqatën e Bizneseve të Vogla “ Esnaf” në Prizren. Ai premtoi se në mandatin e ardhshëm do të angazhohet që bizneset e vogla e në veçanti ato të zejeve të rralla të gëzojnë përkrahje edhe më të madhe.

“Bizneset e traditës prizrenase do të jenë prioritet i Qeverisë së ardhshme të Prizrenit, që të ndihmohen dhe të përkrahjes, sepse karshi ringjalljes së traditës së zejeve do të krijohen edhe mundësi të reja atë punës”, tha Muja

Ai tregoi se si kryetar i Prizrenit, ka qenë i hapur për të gjithë investitorët me qëllimin e vetëm që të rritet numri i të punësuarve siç është rasti i “Mehmet Akifit” dhe Fabrikës së Çokoladës.

“Unë edhe në të ardhmen jam i gatshëm që t’i ndihmoj investitorët për të investuar në Prizren, sepse kemi nevojë për investime dhe për një zhvillim të hovshëm”.

Kryetari i Shoqatës “Esnaf”, Edis Çabrat, njoftoi Mujën për historikun e themelimit të kësaj shoqate.

Çabrat, premtoi me këtë rast se së shpejti do të sjell investitor nga Turqia për ndërtimin e një Spitali si dhe për fillimin e punimeve të disa zejeve të moçme./PrizrenPress.com/

Kandidati BD-së për kryetar të Prizrenit,Zafir Berisha ka marrë përkrahje të fuqishëm në lagjen “Kurillë”. Hapësira e shkollës nuk ka mjaftuar për t’i zënë të gjithë qytetarët e kësaj lagje të cilët kanë pasur dëshirë të dëgjojnë programin zgjedhor të Berishës.

“Kurilla’ është nga lagjet vendimtare për proceset që kanë ndodhur dhe pritet të ndodhin në Prizren dhe unë jam tepër i nderuar që sot shpalosi programin e Bashkimit Demokratik para jush, si shpresë për një qeverisje të suksesshme për 4 vitet e ardhshme”.

Ai tha se zhvillimi ekonomik është prioritet i i BD-së.“Klasa e korruptuar politike që ka qeverisur vendin deri tash e ka sjellë buze greminës qytetarin prizrenas, prandaj ne nuk duhet të lejojmë edhe më tej këtë gjendje të rëndë por duhet të bëhemi unik për ti dhënë fund të keqes së madhe në Prizren”, tha Berisha.

“Tendencat që vizitën e të madhit Taip Erdogan, kryetarin e Turqisë moderne ta keqpërdor dikush për poenë politike, është e pa pranueshme sepse Taip Erdogan nuk vjen për ta mbështetur të pandehurin Muja, sepse ai duke luftuar krimin dhe korrupsionin në vendin e tij Turqinë e sotme e ka bërë superfuqi ekonomike në Botë”.

Kandidati për Asamblenë Komunale Osman Hajdari foli për synimet e ekipit të Bashkimit Demokratik duke veçuar pjesë nga programi i BD-së. “Ngritja e përgjegjësisë në punë arsim,shëndetësi dhe administratë është domosdoshmëri që qytetari të ndihet komod ndaj institucioneve dhe jo siç është duke ndodhur tash të punësuarit në institucionet publike po sillen si padron të qytetarëve.

Ndërsa Delvina Hoti kandidate për Kuvend të Prizrenit nga kjo lagje kërkoi mbështetje për Bashkimin Demokratik numrin74 dhe liderin e BD-së Zafir Berisha/PrizrenPress.com/

Kandidati i Bashkimit Demokratik për kryetar të Prizrenit, Zafir Berisha pas takimit me banoret e fshatit Gjonaj, në mënyrë madhështore u prit edhe në Romajë të Hasit.

Berisha tha se hasjanët me mbështetjen e vizionit të Bashkimit Demokratik, po tregohen të gatshëm që të jenë përkrah qytetarëve tjerë të komunës së Prizrenit për të bërë ndryshimet e shumëpritura në Prizren.

“Numri i madh i të rinjve pa punë na bënë përgjegjës që të jemi në krye të detyrës të cilën na e besojnë qytetarët dhe ne ju garantojmë juve të nderuar qytetarë të Hasit dhe Komunës së Prizrenit se do të angazhohemi për punësimin e të rinjve si dhe ngritjen e cilësisë në arsim, shëndetësi dhe në shërbimet administrative të ndikojnë në mirëqenien e qytetarëve të komunës sonë”.

Bashkimi Demokratik edhe pse nuk ka struktura organizative të saj, vullneti i hasjanëve e veçanërisht të rinjve ka bërë që Berisha të marrë pjesë në shumë takime që i organizohen atij dhe kandidates me origjinë nga Hasi Gentiana Kasolli./PrizrenPress.com/