Nxënësit dhe mësimdhënësit e Malishevës, që kanë mbetur invalidë pas aksidentit në Fushë-Arrëz, ende nuk janë kompensuar financiarisht. Ata pretendojnë se u janë vjedhur një milion euroZeqir Kastrati ka mbetur invalid i përhershëm pas aksidentit që pësoi 9 vjet më parë me autobus, në aksidentin e ndodhur në Fushë-Arrëz, Shqipëri, ku mbetën të vdekur 15 nxënës të gjimnazit ‘Abdyl Frashëri’, të Malishevës dhe 35 të tjerë u lënduan.
Kastrati, i cili njëherësh ka qenë kujdestar i një klase të nxënësve të vitit të katërt, pas aksidentit ka kryer tri operacione, kurse tetë muaj ka qenë i paralizuar. Megjithatë, ai asnjëherë nuk është kompensuar financiarisht nga Byroja Shqiptare e Sigurimeve (BSHS), e cila ka bërë kompensime vetëm për viktimat, ndërsa për të lënduarit dhe invalidët nga ky aksident nuk është bërë ky kompensim asnjëherë – shkruan gazeta Zëri.
Madje të lënduarit nuk kanë marrë deri tani as vendimet për zhdëmtimin e tyre, të cilat BSHS-ja ia kishte konfirmuar IIC Asistance (International Insuarance Claims Handling Bureau) zyrës ligjore për palët e dëmtuara se i ka marrë këto vendime.
Kopja e vendimit për secilin të lënduar veç e veç lidhur me gjendjen mjekësore të bërë nga kompania e sigurimeve ‘Sigal’, së cilës i është besuar ky vlerësim nga BSHS-ja, nuk iu është dorëzuar të lënduarve që vazhdimisht kanë kërkuar dokumentacionin për të ngritur padi, pasi vlerësimi mjekësor, sipas tyre, është bërë në shumën fyese 50-60 euro e për disa deri në 700.